«Լավ եմ, ինձ ոչինչ չի լինի». երեկ զոհված Մերուժանը մասնակցել էր նաև 44-օրյա պատերազմին

Երեկ Հայաստանի արևելյան սահմանագոտում հայ-ադրբեջանական ուժերի միջև տեղի ունեցած փոխհրաձգության հետևանքով զոհված Մերուժան Հարությունյանը ծնունդով Գյումրիից էր, 3 տարվա պայմանագրային ծառայող: Ամուսնացած էր, ունի երկու երեխա՝ 12 տարեկան աղջիկ և 2 տարեկան տղա:

Մերուժանի եղբոր կինը՝ Լիլիթ Հարությունյանը, «Հայկական Ժամանակի» հետ զրույցում պատմեց, որ զոհվելու օրն էլ հենց կապ են ունեցել նրա հետ, ասել է, որ լավ է, եթե 44-օրյա պատերազմում չի զոհվել, հիմա ընդհանրապես ոչինչ չի լինի իրեն:

«Դիրքեր էր բարձրացել նոյեմբերի 14-ին: Դեպքի օրը եղբոր հետ ծառայողական մեքենայով գնացել էին դիրքեր, եղբայրը մնացել էր ներքևում, իսկ Մերուժանը՝ բարձրացել դիրքեր: Ամուսինս՝ իր եղբայրն է մահացած գտել իրեն դիրքում»,- ասաց նա:

Մերուժանը եղբոր հետ ծառայությունն անցկացրել է հիմնականում Գորիսում և Սիսիանում: Բնակվում էր Երևանում: Անընդհատ դիրքերում է եղել, քանի որ շատ է սիրել իր աշխատանքը:

Վերջին անգամ ընտանիքի հետ հանդիպել է նոյեմբերի 12-ին, երբ մի քանի ժամով գնացել է տուն՝ որդու ծննդյան արարողությանը ներկա լինելու: Ընտանիքը նրա մահվան մասին տեղեկացել է մամուլից:

«Հայրենիքը սիրում էր ամենից շատ: Եղբոր հետ նույն զորամասում է ծառայել: Շատ կապված եղբայրներ էին, մեկը մյուսին երբեք մենակ չէր թողնում: Բոլորն ասում էին՝ դուք իրար հետ մի ծառայեք»,- պատմում է Լիլիթը:

30 տարեկան Մերուժանը մասնակցել էր նաև 44-օրյա պատերազմին, այդ ժամանակ ստացել էր վիրավորում, սակայն մարտը շարունակել էր մինչև պատերազմի ավարտը:

Հիշեցնենք՝ երեկ՝ նոյեմբերի 16-ին՝ ժամը 13:00-ից, Սյունիքում Ծիծեռնաքար լեռան հայկական 2 դիրքերի համար փոխհրաձգություն էր սկսվել ադրբեջանական և հայկական կողմերի զինված ուժերի միջև։

Փոխհրաձգությունը սկսվել էր այն բանից հետո, երբ ադրբեջանական կողմը պահանջել էր հայկական զինված ուժերից լքել Հայաստանի տարածքում գտնվող Ծիծեռնաքարի երկու մարտական հենակետերը, սակայն մեր զինծառայողները հրաժարվել էին կատարել այդ պահանջը:

Ըստ ՀՀ պաշտպանության նախարարության տարածած հաղորդագրության՝ հայ և ադրբեջանական ուժերի միջև ընթացող մի քանի ժամյա մարտերը երեկ դադարել են ժամը 18:30-ին՝ ռուսական կողմի միջնորդությամբ ձեռք բերված պայմանավորվածության համաձայն:

Հայկական կողմն ունի 1 զոհված և 13 գերեվարված զինծառայող։ Եվս 24 զինծառայողի հետ կապը կորել է մարտական գործողությունների ընթացքում, և նրանց ճակատագիրն այս պահին անհայտ է։ Զինծառայողների հայտնաբերման ուղղությամբ ընթանում են ինտենսիվ աշխատանքներ։

Հակառակորդի վերահսկողության տակ է անցել երկու մարտական հենակետ։ Ռուսական կողմի միջնորդությամբ ընթանում են բանակցություններ՝ ստեղծված իրավիճակի հանգուցալուծման և գերեվարված հայ զինծառայողների վերադարձի շուրջ։

Ադրբեջանի պաշտպանության նախարարությունը նույնպես հայտնել է  իր զոհերի մասին: Հաղորդագրության մեջ նշվում է, որ երեկ՝ նոյեմբերի 16-ին, ՀՀ զինված ուժերի հետ մարտերի հետևանքով 7 ադրբեջանցի զինծառայողի է զոհվել: Նրանց թվում մեկ սպա կա: Նշվում է նաև 10 զինծառայողի վիրավորվելու մասին:

Մերի Խաչատրյան