Լարված իրավիճակ՝ Փարաքարում. ոստիկանական մեծ ուժեր են բերվել

Փարաքարում իրավիճակը լարված է։ Ոստիկանական մեծ ուժեր են կուտակվել ու շարունակում կուտակվել։ Բանն այն է, որ ժամը 10։00-ին պետք է տեղի ունենա Դավիթ Մինասյանի երդմնակալությունը, ապա ժամը 12:00-ին «Ապրելու երկրից» Վոլոդյա Գրիգորյանի երդմնակալությունը։

Հիշեցնենք, որ Փարաքարում աբսուրդ մի իրավիճակ է ստեղծվել ՏԻՄ ընտրություններից հետո, ինչի արդյունքում Փարաքարն այս պահին երկու համայնքապետ ունի։  Ավագանի անցած երեք ուժերից եւ ոչ մեկը չէր հավաքել 50+1 ձայն, եւ կոալիցիա կազմելու անհրաժեշտություն կար։ Առաջատարն «Ապրելու երկիր» կուսակցությունն է՝ 48,94% ձայնով։ Ցուցակի առաջին համարը Վոլոդյա Գրիգորյանն է՝ Մերձավան համայնքի ներկայիս ղեկավար Լեւոն Գրիգորյանի որդին։ Գործող համայնքապետն առաջադրվել է «Դավիթ Մինասյան դաշինքով» եւ 23,51% ստացել, իսկ ՔՊ-ն, որի թեկնածուն Լյուդվիգ Գյուլնազարյանն է՝ 27,54%։ Բոլոր 3 ուժերն էլ  համայնքապետի թեկնածուներ են առաջադրել, սակայն նիստը վարողը, որն «Ապրելու երկիր» կուսակցության ներկայացուցիչն է, հրաժարվել էր գրանցել ՔՊ-ի ու «Դավիթ Մինասյան դաշինքի» առաջադրած Փարաքարի համայնքապետ Դավիթ Մինասյանի թեկնածությունը, ասել էր, թե ՏԻՄ օրենքը պահանջում է, որ նախապես գրավոր դիմեն։ Մյուս կողմն էլ պնդել է, որ օրենքը նման պահանջ չի ներկայացնում, եւ կարող են նիստի ընթացքում առաջադրումներ անել, ու պահանջել են գրանցել թեկնածուներին։ Սակայն կողմերը լեզու չեն գտել։

Նշենք, որ այժմ բողոքի ակցիա են իրականացնում Գրիգորյանի աջակիցները։