Ձվի մեջ մազ փնտրելու արվեստը

Հայաստանյան որոշ շրջանակների անդորրը լրջորեն խախտվել է Ալեն Սիմոնյանի ԱԺ նախագահ դառնալուց հետո։ Տպավորություն է, թե այդ շրջանակները, մի կողմ թողած Հայաստանի առջև ծառացած իրական հիմնախնդիրները, առիթ են փնտրում ձվի մեջ մազ գտնելու և անհեթեթ շահարկումներ անելու։

Մի շարք լրատվամիջոցներ էլ նոր թեմա են գտել ինքնադրսևորման համար, իբր սենսացիա բստրել, թե կառավարության որոշմամբ ԱԺ նախագահի համար գնված մեքենան ապահովագրել են Խաչատուր Սուքիասյանին պատկանող «Սիլ Ինշուրանս» ապահովագրական ընկերությունում և ապահովագրությունն արժեցել է 1.602.000 դրամ։

Հայաստանի կառավարությունը, հիշեցնենք, նոյեմբերի 25-ին ընդունել էր Ազգային ժողովի նախագահի համար 90 մլն դրամ արժողությամբ BMW 750Li xDrive LCI դասի ծառայողական ավտոմեքենա գնելու որոշումը։ Ներկայացուցչական դասի այդ մեքենայի ապահովագրությունը Հայաստանում գործող յուրաքանչյուր ապահովագրական ընկերությունում էլ նույն գինն էր արժենալու։ Ապահովագրությունն իրականացվում է մեքենայի տարեթվի, ձիաուժերի, համապատասխան այլ չափորոշիչների պահպանմամբ, և այդ մակնիշի մեքենայի ապահովագրությունը թանկ հաճույք է։ Իհարկե, եթե այլ ընկերությունում իրականացվեր այդ ապահովագրությունը, նույն շրջանակները հիմա էլ պիտի «քեռու եզան գյուղացի» որոնեին այդ ընկերությունում, հիշեին, որ ԱԺ նախագահը շփվել է որևէ ընկերության սեփականատիրոջ մորաքրոջ թոռան հարևանի հետ։

 

Ըստ էության, թե՛ այս, թե՛ ԱԺ նախագահի հետ կապված ցանկացած հարցում նույն մեխանիզմն է գործում՝ գտնել սենսացիա այնտեղ, որտեղ այն իրականում գոյություն չունի։ Չի կարելի, պարզապես չի կարելի այդքան մանիպուլացնել հասարակությանը, սևացնել ամեն ինչ և շահարկման առարկա դարձնել նույնիսկ օրենքով հստակ սահմանված պահանջները։ Ի վերջո, դրանով այդ անձինք իրենց և իրենց հեղինակությանն են վնաս հասցնում, այլ ոչ ՀՀ ինստիտուտներին։