Հայաստանը ստեղծելու է տեղեկատվական անվտանգությունն ապահովող նոր ենթակառուցվածքներ
Հասարակություն
Հայաստանի Հանրապետությունը նախատեսում է 2016 թվականին ստեղծել տեղեկատվական անվտանգությունն ապահովող տեխնիկական նոր ենթակառուցվածքներ: Ինչպես հաղորդում է «Արմենպրես»-ը, աշխատանքների իրականացումն ընդգրկված է ՀՀ կառավարության գերակա ծրագրերի թվում:
ՀՀ-ն արտաքին աշխարհին կապող մալուխային կապի գծերի հնարավոր խափանումների, վնասվածքների և արգելափակումների պարագայում պետական գերատեսչությունների ինտերնետ կապն ապահովելու նպատակով առաջարկվում է ստեղծել համապատասխան տեխնիկական ենթակառուցվածք՝ այլընտրանքային արբանյակային ինտերնետ կապուղու համար:
Ըստ ՀՀ տրանսպորտի և կապի նախարարության, արբանյակային ինտերնետ կապուղու փորձարկումը հաջողությամբ իրականացվել է «Շանթ-2015» համապետական ռազմավարական հրամանատարաշտաբային զորավարժությունների շրջանակում և արժանացել բարձր գնահատականի:
Հանրապետության հեռուստառադիոհաղորդիչ ցանցում կարևոր դեր և ռազմավարական մեծ նշանակություն ունեցող Երևանի հաղորդիչ կենտրոնի շարքից դուրս գալու դեպքում, վերջինիս ֆունկցիոնալությունն ապահովելու նպատակով, առաջարկվում է ստեղծել նաև շարժական կայան, որի միջոցով ցանկացած պահի հնարավոր կլինի իրականացնել հեռարձակումը ինչպես մայրաքաղաքում, այնպես էլ արարատյան դաշտավայրի բնակավայրերում՝ ընդգրկելով ՀՀ բնակչության շուրջ 55 տոկոսը: Շարժական կայանը համալրված կլինի ազդանշանների ընդունման, թվայնացման, փաթեթների ձևավորման, եթե րային, արբանյակային և ինտերնետ հեռարձակման ահամապատասխան սարքավորումներով: Շարժական կայանում պետք է նախատեսվի նաև 15-20մ բարձրությամբ արագ տեղակայման կայմ, անխափան և ավտոնոմ էլեկտրասնուցման համակարգեր: Այն պետք է ունենա հրատապ ռեպորտաժ պատրաստելու և հաղորդելու հնարավորություն:
Մարզային որևէ կայանի շարքից դուրս գալու դեպքում, տվյալ հեռուստակայանի ընդգրկման գոտում հեռարձակումն ապահովելու համար առաջարկվում է ստեղծել շարժական հաղորդիչ կայան, որը համալրված կլինի արբանյակից ազդանշանի ընդունման և հեռարձակման համար նախատեսված սարքավորումներով, ինչպես նաև ավտոնոմ էլեկտրասնուցման համակարգով և արագ տեղակայման կայմով: Անհրաժեշտության դեպքում շարժական կայանը պետք է տեղադրվի խնդրո առարկա տարածքի որևէ ապահով գերիշխող բարձրունքում և իրականացնի հեռարձակումը: Նկատի ունենալով մարզային կայանների մեծ քանակությունը ( շուրջ 200), առաջարկվում է կոմպլեկտավորել երկու նմանատիպ շարժական կայան:
Առաջարկվող տեխնիկական ենթակառուցվածքների ստեղծումը թույլ կտա պատրաստ լինել պատերազմական, արտակարգ և չնախատեսված վիճակներում բնակչությանը անխափան տեղեկատվություն հաղորդելուն:
1
2
3
4
5
1
2
3
5
1
2
3
4
5
