Ճապոնիայում 112 տարեկան հասակում մահացել Է մոլորակի ամենածեր տղամարդը

Ճապոնիայում 112 տարեկան հասակում հունվարի 19-ին մահացել Է մոլորակի ամենածեր տղամարդը՝ Յասուտարո Կոիդեն: Այդ մասին ինչպես տեղեկացնում Է «Արմենպրես»-ը, հայտնել են Նագոյա քաղաքի այն հիվանդանոցի ներկայացուցիչները, որտեղ նա բուժվում Էր: Մահվան պատճառ Է դարձել սրտի քրոնիկ անբավարարությունը:

Երկարակյացը ծնվել Է 1903 թվականի մարտի 13-ին Ֆուկուա պրեֆեկտուրայի Ցուգուրա քաղաքում: Նագոյա Է տեղափոխվել 107 տարեկան հասակում: Գործնականում մինչեւ իր մահը նա առողջության հետ կապված լուրջ խնդիրներ չի ունեցել եւ կարողանում Էր կարդալ առանց ակնոցի:

Կոիդեն պաշտոնապես մոլորակի ամենածեր տղամարդն Էր ճանաչվել անցյալ տարվա օգոստոսին, երբ նույնպես 112 տարեկան հասակում վախճանվեց նրա հայրենակիցը՝ Սակարի Մոմոին:

Ճապոնիայում կյանքի միջին տեւողությունն ամենաբարձրերից մեկն Է աշխարհում: Տղամարդկանց համար այդ ցուցանիշը 80,5 տարի Է, կանանց համար՝ 86,83 տարի: Վիճակագրության տվյալներով՝ Ճապոնիայի 80-ից բարձր տարիքի բնակիչների թիվն անցյալ տարի ազգային պատմության մեջ առաջին անգամ գերազանցել Է 10 միլիոնը: 65-ից բարձր տարիքի բնակիչները Ճապոնիայում 34,8 մլն են: Նրանց բաժին Է ընկնում երկրի ամբողջ բնակչության 26,7 տոկոսը, ինչը նույնպես ռեկորդ Է դարձել նրա ողջ պատմության ընթացքում:

Մասնագետների գնահատումների համաձայն՝ ներկայիս միտումների պահպանման դեպքում 2040 թվականին 65-ից բարձր տարիքի մարդկանց բաժին կընկնի Ճապոնիայի բնակչության ավելի քան 36 տոկոսը, հաղորդել Է ՏԱՍՍ-ը: