Հակահայկական բանաձևերը ԵԽԽՎ օրակարգ են ընդգրկվել վեհաժողովի կանոնակարգի խախտումներով. Վահան Բաբայան

Եվրոպայի խորհրդի խորհրդարանական վեհաժողովի ձմեռային նստաշրջանի օրակարգում ընդգրկված հակահայկական զեկույցները խախտում են վեհաժողովի կանոնակարգը: Այս մասին հունվարի 19-ին լրագրողների հետ հանդիպմանն ասաց ԵԽԽՎ հայաստանյան պատվիրակության անդամ, ԱԺ ԲՀԿ խմբակցության պատգամավոր Վահան Բաբայանը: «Այդ զեկույցները խախտում են ԵԽԽՎ կանոնակարգի կետերից մեկը, որը նախատեսում է համակողմանի ուսումնասիրությու ն և զեկուցողի պարտադիր այցելություն խնդրո առարկա հանդիսացող տարածաշրջան: Դուք գիտեք նաև, որ զեկույցներից մեկի հեղինակ Ռոբերտ Ուոլթերի կինը Ադրբեջանի քաղաքացի է և այնտեղ մեծ կապեր ունի: Ուոլթերն էլ Թուրքիայի քաղաքացիություն է ստացել և ունի հակահայկական մոտեցումներ: Նա այդ զեկույցում գրել է, որ Լեռնային Ղարաբաղից Ադրբեջանի քաղաքացիներ են տեղահանվել, սակայն ոչ մի խոսք չկա այն մասին, թե որքան հայեր են այդ տարածքից տեղահանվել: Այսինքն, նման զեկույցով փորձ է արվում թյուրիմացության մեջ գցել միջազգային հանրությանը»,- «Արմենպրես»-ի հաղորդմամբ՝ նշեց Բաբայանը:

Պատգամավորը վստահեցրեց, որ ոչ միայն ԵԽԽՎ հայաստանյան պատվիրակությունը, այլ նաև Հայաստանի արտաքին քաղաքականությամբ զբաղվող բազմաթիվ պաշտոնյաներ բոլոր ջանքերը գործադրել են՝ այդ զեկույցների քվեարկության օրը հաջողություն գրանցելու համար: «Մենք ամեն ինչ անելու ենք, որպեսզի արդյունքները մեզ համար լինեն դրական: Ես հիմա չեմ կարող շատ բան ասել մեր քայլերի մասին, բայց վստահեցնում եմ, որ բոլոր ջանքերը գործադրվել են և գործադրվելու են»,- ասաց Բաբայանը:

Նա նաև հավելեց, որ այդ զեկույցների ընդունումը խախտելու է ԼՂ հակամարտության խաղաղ կարգավորման գործընթացը: Պատգամավորի խոսքով՝ ԵԽԽՎ-ն այն հարթակը չէ, որտեղ կարող են հնչել հայտարարություններ, որոնք դուրս են ԵԱՀԿ Մինսկի խմբի համանախագահների հայտարարություններից: «Սա նոր քարոզչական զենք է, որը մեր հակառակորդները փորձելու են օգտագործել մեր դեմ»,- ընդգծեց պատգամավորը:

Վահան Բաբայանը շեշտեց, որ իրենց ծանր աշխատանք է սպասվում: «Ես վստահ եմ, որ աշխարհը չի կարող աչք փակել այն ամենի վրա, ինչ կատարվել է տարիների առաջ Լեռնային Ղարաբաղում: Մանավանդ աշխարհաքաղաքական այս դժվար իրավիճակում, չեմ կարծում, որ աշխարհը կարող է աչք փակել իրականության վրա»,- եզրափակեց  նա: