Ուկրաինայի առաջին տիկինը հանդես է եկել բաց նամակով

Ուկրաինայի առաջին տիկին Ելենա Զելենսկայան բաց նամակ է գրել համաշխարհային լրատվամիջոցներին։ Նամակում նա եւս մեկ անգամ միջազգային հանրությունից խնդրել է փակել Ուկրաինայի երկինքը։

«Չնայած այն բանին, որ մերձկրեմլյան քարոզչական պարբերականները սա անվանում են «հատուկ գործողություն», սակայն իրականում այն Ուկրաինայի խաղաղ բնակչության զանգվածային սպանություն է։ Թերեւս ամենից սարսափելին եւ կործանիչն այս ներխուժման մեջ հանդիսանում են երեխաների շրջանում զոհերը։ Ութամյա Ալիսան, որ զոհվել էր Ախտիրկայի փողոցում, երբ պապը փորձել էր պաշտպանել նրան, կամ Պոլինան Կիեւից, որ զոհվել էր ծնողների հետ միասին՝ կրակի թիրախում հայտնվելով, կամ 14-ամյա Արսենին, որ վիրավորվել էլ գլխից, եւ ում փրկել չհաջողվեց, քանի որ շտապ բուժօգնության մեքենան չէր կարողացել ժամանակին մոտենալ՝ խոշոր հրդեհի պատճառով։ Երբ Ռուսաստանն ասում է, որ պատերազմ չի վարում խաղաղ բնակչության դեմ, ես սկզբում այս զոհված երեխաների անուններն եմ հիշատակում։ Մեր կանայք եւ երեխաները հիմա ապրում են ռմբապաստարաններում եւ ներքնահարկներում։ Ուկրաինան խաղաղություն է ուզում։ Սակայն Ուկրաինան նաեւ կպաշտպանի իր սահմանները, կպահպանի իր անհատականությունը։ Դրանում զիջումներ լինել չեն կարող։ Մեզ հարկավոր է, որպեսզի Ուկրաինայի երկինքը փակվի։ Դուք փակեք երկինքը, իսկ գետնի վրա պատերազմում մենք կհաղթենք ինքներս։ Պատերազմն Ուկրաինայում «ինչ որ տեղ պատերազմ» չէ, այլ պատերազմ է Եվրոպայում, ԵՄ սահմաններից ոչ հեռու։ Եթե մենք չկանգնեցնենք Պուտինին, ով սպառնում է միջուկային պատերազմ սկսել, մեզանից ոչ  մեկի համար աշխարհում այլեւս անվտանգ տեղ չի լինի»,- ասված է Ելենա Զելենսկայայի նամակում։

Այս մասին կարդալիս ակամա հիշում ես, թե ինչով էր զբաղված ՀՀ վարչապետի տիկին Աննա Հակոբյանը 44-օրյա պատերազմի ընթացքում՝ սկսած սոցկայքային ակտիվությունից, մինչեւ ոչ այնքան հասկանալի «Էրատո» ջոկատի կազմավորումը. այդպես էլ չհասկացվեց, թե ինչ էր անելու կամ ինչու ընտրվեց Հայոց պատմության մեջ բավականին կասկածելի համբավ ունեցող Էրատո թագուհու անունը այդ ջոկատի անվանման համար։