«Հիմնական գործընկերոջ» տնտեսական ազդեցությունները թվային արտահայտությամբ

Նարեկ Սարգսյանը ֆեյսբուքյան իր էջում գրում է .

Արժույթի միջազգային հիմնադրամի փորձագետները վատթարացրել են Ռուսաստանի տնտեսության զարգացման կանխատեսումները 2016 թվականի համար: Ըստ կանխատեսման նորացված տարբերակի, որն հրապարակվել է այսօր, ընթացիկ տարում Ռուսաստանի ՀՆԱ-ն կկրճատվի 1 տոկոսով, և ոչ թե 0.6 տոկոսով, ինչպես նշվում էր հոկտեմբերին արված կանխատեսման մեջ:

Փաստաթղթում նշվում է, որ Ռուսաստանի տնտեսությունը կշարունակի գտնվել ռեցեսիայի մեջ համաշխարհային շուկայում նավթի գների անկման և Արևմուտքի կողմից կիրառվող պատժամիջոցների ճնշումներով պայմանավորված: ԱՄՀ նաև նշել է, որ Ռուսաստանի տնտեսության անկումը իր բացասական ազդեցությունը կունենա ԱՊՀ այլ երկրների տնտեսությունների վրա, որոնց մի մասը անմիջականորեն առնչվեց նավթի արտահանմամբ պայմանավորված եկամուտների կրճատմանը:

Թեպետ Հայաստանը նավթի գների անկումից անմիջական վնասներ չի կրում, և նույնիսկ այդ հանգամանքով պայմանավորված, ակնկալում է Ռուսաստանից ներմուծվող էներգակիրների սակագնի իջեցում, այնուամենայնիվ, մեր հիմնական գործընկեր՝ Ռուսաստանի տնտեսության բացասական ազդեցությունը ակնհայտ է: Հիմնականում այն դրսևորվում է տրանսֆերտների կրճատմամբ, ինչն էլ պայմանավորում է ապրանքաշրջանառության ծավալների կրճատումը:

Օրեր առաջ Համաշխարհային բանկի կողմից հրապարակված «Համաշխարհային տնտեսության հեռանկարները» զեկույցի համաձայն այս տարի Ռուսաստանի տնտեսական անկումը կանխատեսվել է 0.7%։ Անցյալ տարին ՌԴ-ն փակեց 3.8% բացասական ցուցանիշով։

Համաշխարհային բանկը իր զեկույցում, նույնպես անդրադարձել է Ռուսաստանի տնտեսական անկման բացասական հետևանքներին հարևան երկրների, հատկապես Հայաստանի, Ղրղզստանի, Մոլդովայի, Տաջիկստանի և Ուկրաինայի համար, որոնք մեծ ծավալի մասնավոր դրամական փոխացումներ են ստանում Ռուսաստանից: ՀԲ վերլուծությունների համաձայն Ռուսաստանի տնտեսության 1 տոկոսանոց անկումը նվազեցնում է Հայաստանի տնտեսական աճի ցուցանիշը 0.6 տոկոսային կետով։

Կանխատեսման համաձայն 2017 թվականին Ռուսաստանի տնտեսությունը արդեն կարձանագրի 1 տոկոսանոց համեստ աճ, ինչն իր հերթին կնպաստի ԱՊՀ այլ երկրների տնտեսական աճին:

Ազդեցությունը ազդեցությունով, բայց թաղթին նստած բախտին սպասելու ժամանակը չէ: Աշխարհաքաղաքական և տարածաշրջանային գործընթացները նոր խաղաքարտեր է բաժանում ակտիվ մասնակիցների համար: Հայաստանն էլ այս իրավիճակում, ճկունություն դրսևորելու պարագայում կարող է իր օգուտները ունենալ: