Ազարա՞թ, թե՞ Արաբատ. մեկ մարդու դեմքով նվաստացնում են պետությունը

Թուրքիայի Անթալիա քաղաքում ավարտված դիվանագիտական համաժողովին Հայաստանի մասնակցությունը, ինչպես ի սկզբանե նշել էին բազմաթիվ վերլուծաբաններ, սխալ և չհաշվարկված քայլ էր Հայաստանի գործող վարչախմբի կողմից։ Ֆորումին Հայաստանից մասնակցեց միայն արտգործնախարար Արարատ Միրզոյանը, իսկ նրա նկատմամբ թուրքական լրատվամիջոցների, վերլուծական և քաղաքական շրջանակների, ինչպես նաև միջազգային հանրության արձագանքը, ոչ միայն բացասական էր, այլ ընդսմին՝ ծաղրալի։

Թուրքական լրատվամիջոցները չէին խորշում իրենց եթերում ձևախեղել Արարատ Միրզոյանի անունը, մի տեղ Արաբատ էին գրում, մի տեղ էլ՝ Ազարաթ։ Թերևս, թուրքերի համար սկզբունքային կարող է լինել արտգործնախարարի Արարատ անունը և, դեռ լավ է, որ նրա անունը չեն գրել Աղրիդաղ Միրզոյան։ Իսկ երկու օր տևած ֆորումի ընթացքում Արարատ Միրզոյանը ընդամենը մի քանի հանդիպում է ունեցել, այն էլ Ռուսաստանի արտգործնախարար Սերգեյ Լավրովի, մեկ-երկու եվրոպական արտգործնախարարի և Թուրքիայի արտգործնախարար Մևլութ Չավուշօղլուի հետ։ Վերջինիս հետ հանդիպումից հետո Միրզոյանը դրական ուղերձ է համարել դիվանագիտական ֆորումին մասնակցելու հրավերը և ասել. «Մեր հանդիպման ընթացքում վերահաստատել ենք երկու կողմի պատրաստակամությունը շարունակել կարգավորման, նորմալացման գործընթացը, հարաբերությունների հաստատման և սահմանների բացման նպատակով առանց որևէ նախապայմանների, և մեր երկու ներկայացուցիչներն աշխատում են այս ուղղությամբ»։

Հայաստանի արտգործնախարարը հույս է հայտնել հայ-թուրքական բանակցություններում դրական արդյունքներ տեսնել մոտ ապագայում։ «Ուրախ եմ տեսնել, որ տարածաշրջանի բոլոր ժողովուրդները, բոլոր պետությունները փորձում են կառուցել խաղաղություն և կայունություն մեր տարածաշրջանում, համենայն դեպս Հայաստանի կողմից այդ պատրաստակամությունը ՝ ունենալ կայուն ու խաղաղ տարածաշրջան, կա»։

Թուրքիայի արտգործնախարարի արձագանքը շատ ավելի զուսպ էր. նա ընդամենը շնորհակալություն է հայտնել հրավերն ընդունելու համար և ասել, թե հանդիպումը չափազանց արդյունավետ և կառուցողական էր։ Թե՛ նախապայմանների, թե՛ հստակ պայմանավորվածությունների վերաբերյալ Թուրքիայի արտգործնախարարը ոչինչ չի ասել, ինչը, ըստ էության, նշանակում է, որ Արարատ Միրզոյանին ընդամենը կանչել էին Անթալիայի ֆորումին՝ արցախյան 44-օրյա պատերազմից հետո Հայաստանը նրա դեմքով կրկին նվաստացնելու և մեր տեղը ցույց տալու համար։ Նույնիսկ քննարկման պանելներին, որտեղ ելույթ են ունեցել թուրք և այլ օտարերկրացի պաշտոնյաներ, Արարատ Միրզոյանին թույլ չեն տվել մասնակցել։

Մեր աղբյուրների փոխանցմամբ, թեև նույնիսկ խոստացված է եղել, սակայն այդպես էլ նրա ելույթը որևէ կերպ օրակարգում չի ընդգրկվել։ Ընդամենը Հայաստանի գործող իշխանությունները հերթական անգամ բոբիկացել էին՝ ջուրը չտեսած։ Իսկ նրանց նկատմամբ վերաբերմունքն ընդգծում է Հայաստանի իշխանությունների և պետության նկատմամբ՝ թուրքերի և այլոց իրական տրամադրվածությունը։

Դանիել Նահապետյան