«Դաժան» պայքար ծխելու դեմ․ վնասում են միայն բիզնեսին

Նախօրեին ուժի մեջ է մտել Առողջապահության նախարարության առաջարկած նախաձեռնությունը, որով հանրային սննդի օբյեկտներում կտրականապես արգելվում է ծխախոտը և ծխախոտի բոլոր տեսակի փոխարինիչները։ Ընդ որում Նիկոլ Փաշինյանի թեթև ձեռամբ, արգելքը տարածվում է ոչ միայն փակ, այլ նաև բաց տարածքների վրա։ Գնահատելով առողջապահության նախարարության պայքարը ծխելու դեմ և «մտահոգությունը» հանրային առողջության վերաբերյալ՝ հարկ ենք համարում նշել, որ ծխելու դեմ նման բարբարոսական մեթոդներով որևէ առաջընթացի չեն հասնելու, ընդհակառակը, ստացվելու է միայն հերթական «պտիչկան», երբ Անահիտ Ավանեսյանը ու նրա անմիջական ղեկավարությունը կկարողանան հրապարակային հայտարարել, թե պայքարում են հայ ժողովրդի առողջության համար, իսկ իրականում կտուժի բիզնեսը, կտուժեն հանրային սննդի բազմաթիվ օբյեկտներ։

Ընդ որում բոլոր այդ օբյեկտների մեծ մասը տեղակայված են Երևան քաղաքի կենտրոնում, որտեղ ամենամեծ կենտրոնացումն է և ամենամեծ գումարն է շրջանառվում հանրային սննդի օբյեկտներում։ Պրակտիկորեն Հայաստանի իշխանությունները ու նրա տեսչական մարմինները չունեն համապատասխան ռեսուրսներ բոլոր օբյեկտները անընդհատ ստուգելու համար։ Եվ որևէ մեկին չի խանգարում Երևանի ծայրամասում կամ մերձակա որևէ շրջանի որևէ ռեստորանի առանձնասենյակում խմել և ծխել։ Վստահաբար ռեստորանների մեծ մասի սեփականատերերը չեն արգելելու նման պահվածքը և, ընդհակառակը, տեսուչներին թույլ չեն տալու, որպեսզի նրանք ստուգումներ իրականացնեն։

Արդյունքում Երևան քաղաքի կենտրոնի տասնյակ և հարյուրավոր ռեստորաններ, խորտկարաններ և սրճարաններ զրկվելու են լուրջ ֆինանսական հոսքերից, փակվելու են կամ ստիպված են լինելու տեղափոխել իրենց բիզնեսը այլ համապատասխան վայրեր՝ կոծկելով, որ իրենց մոտ հաճախորդները ծխում են։ Իհարկե, ծխելու դեմ արշավը բավականին կարևոր է, շատ ավելի կարևոր քան աղի և աղամանների դեմ պայքարը, որը տանում է նույն Անահիտ Ավանեսյանը։ Սակայն վաղուց Հայաստանի քաղաքացիները հասկացել են, որ միայն դեկլարատիվ կոչերով և մեկ-երկու կիսաքայլերով հնարավոր չէ որևէ բանի հասնել։ Փաշինյանը կարող է տարեվերջին իր հարյուր ձեռքբերումների մեջ ավելացնել նաև ռեստորաններում ծխողների թվի նվազումը, սակայն առավել կարևոր է՝ արդյո՞ք դա կազդի հանրության շրջանում ծխողների թվի իրական նվազման վրա, վստահաբար՝ ոչ։ Փոխարենը մարդիկ զարտուղի ճանապարհներ են գտնելու և շարունակելու են ծխել՝ վնասելով սեփական առողջությունը։

Կարեն Մկրտչյան