Եթե ՀՀ քաղաքացին նաև ՌԴ քաղաքացի է, ապա Ռուսաստանում ենթակա է զորակոչի. Ինչ է սպասվում նրանց, որոնք լքել են ՌԴ-ը

ՌԴ նախագահ Վլադիմիր Պուտինը հրամանագիր է ստորագրել գարնանային զորակոչի մասին։ Փաստաթղթի համաձայն՝ ՌԴ զինված ուժեր կզորակոչվի 134,5 հազար մարդ։ Այն վերաբերում է 18-27 տարեկաններին:

Այս առնչությամբ, Ռուսաստանի հայ փաստաբանների ԱՐՄՌՈՍՍ ասոցիացիայի նախագահ Ռուբեն Կիրակոսյանը «Առաջին լրատվական»-ի հետ զրույցում նշեց, որ սա վերաբերում է նաև այն ՀՀ քաղաքացիներին, որոնք ունեն նաև ՌԴ քաղաքացիություն:

«Ռուսաստանի օրենսդրությունն այնպիսին է, որ եթե անձը ունի երկքաղաքացիություն, Ռուսաստանը նրան ընդունում է որպես ՌԴ քաղաքացի: Այստեղ կա մի ուրիշ բան, եթե քաղաքացին ունի ապացույցներ, որ արդեն ծառայել է մյուս պետությունում, դա հաշվի է առնվում: Իսկ եթե չունի այդպիսի փաստաթղթեր, ուրեմն նա համարվում է զորակոչիկ, պարտավոր է Ռուսաստանում կանգնել հաշվառման զինկոմիսարիատում: Նա ճանաչվում է որպես լիարժեք զորակոչիկ: Խոսքը 18-27 տարեկանների մասին է:

Կան, իհարկե, բացառություններ, երբ չեն զորակոչվում՝ կապված առողջության կամ որոշակի մասնագիտություն ունենալու հետ: Բայց ընդհանուր կարգն այն է, որ այդ 134 հազար հոգին ճանաչված են որպես զորակոչին համապատասխանող»,-ասաց Ռուբեն Կիրակոսյանը: Նա դժվարացավ նշել թե, որքան են կազմում զորակոչի ենթակա ՀՀ քաղաքացիները:

Ինչ վերաբերում է այն քաղաքացիներին, որոնց վերաբերում է այս զորակոչը, սակայն նրանք լքել են Ռուսաստանը և հիմա գտնվում են Հայաստանում կամ մեկ այլ երկրում, Կիրակոսյանն ասաց. «Եթե նրանք մտնում են զորակոչի տարիքային խմբի մեջ, նրանք ևս պարտավոր են մասնակցել զորակոչին: Եթե չներկայանան, դա կարող է իրավական հետևանքներ թողնել: Եթե նրանք հաշվառման են կանգնած զինկոմիսարիատում, Ռուսաստանում մշտական գրանցում ունեն և փոխում են իրենց բնակավայրը, պարտավոր են տեղեկացնել զինկոմիսարիատին»:

Նա նաև տեղեկացրեց, որ ՌԴ կառավարությունը վերջերս քննարկում էր պարտադիր զինծառայության հետ կապված արտոնություններից օգտվողների ցանկում ընդգրկել նաև IT ոլորտի աշխատողներին. «Այնպես որ այս պահին Հայաստանում գտնվող անձանցից շատերը կարող են արդեն այդ արտոնությունն ունենալ: Ուղղակի պետք է ամեն մեկն իր համար ուսումնասիրի և հասկանա իր կարգավիճակը»:

Դիտարկմանը, որ 44-օրյա պատերազմից հետո շատերը փորձեցին իրենց որդիներին ՌԴ քաղաքացի դարձնել, որ ազատվել ՀՀ-ում զինծառայությունից, բայց հիմա կարող են հայտնվել ռուս-ուկրաինական պատերազմի թատերաբեմում, Ռուբեն Կիրակոսյանն արձագանքեց. «Այնտեղ մասնակցում են ոչ թե զորակոչիկները, այլ պայմանագրայինները: Բայց որ նրանց շարքերում կան հայեր, դա փաստ է, շատերը նույնիսկ շքանշաններ են ստացել»: