Հայաստանի իշխանական համակարգում նոր ճաքեր են սպասվում

Ռուս-ուկրաինական պատերազմով պայմանավորված և Ռուսաստանի դեմ պատժամիջոցների պատճառով, տնտեսական իրավիճակը առաջիկայում խստորեն վատթարանալու է նաև Հայաստանում։ Ըստ էության, եթե միջազգային վարկանիշային կազմակերպություններն ընդամենը միայն տնտեսական աճի շեշտակի անկում են արձանագրում, մեր տեղեկություններով Հայաստանի կառավարությունում տեղյակ են, որ իրավիճակն ամենևին էլ այդպես չէ, և անկումը շատ ավելի լուրջ է լինելու, իսկ գների կտրուկ աճը բոլոր տեսակի ապրանքների համար անմիջականորեն խփելու է բնակչության գրպանին։ Այս իմաստով Փաշինյանը վստահ է, որ բնակչության մի ստվար զանգված, նույնիսկ այն հատվածը, որն իրեն է քվե տվել խորհրդարանական արտահերթ ընտրություններում, կարող են բողոքի ակցիաներ սկսել, սասանել իշխանության հիմքերը։ Ինչպես նման դեպքերում անում է իշխանությունը, փորձում են գտնել քավության նոխազների և կոտրել նրանց գլխին։

Խոսքը առաջին հերթին ֆինանսական բլոկի պատասխանատուների մասին է։ Մասնավորապես մեր տեղեկություններով լուրջ հակասություններ կան ֆինանսական բլոկի պատասխանատուների և «Քաղաքացիական պայմանագրի» վարչության միջև։ Առանց այն էլ ֆինանսական բլոկի բոլոր պատասխանատուները կա՛մ նախկիններ են, կա՛մ Փաշինյանի հրամանով նշանակված Վահան Քերոբյանը, որոնք մեծ վստահություն չեն վայելում «Քաղաքացիական պայմանագրի» վարչությունում։ 90-ականների ֆինանսների մասին Վանո Սիրադեղյանի հայտնի ասածը, նույնիսկ այսօր է շրջանառվում «Քաղպայմանագրի», փաշինյանական սպասարկուների շրջանում՝ փորձելով համոզել, որ Նիկոլ Փաշինյանը տնտեսական խնդիրների հետ առանձնապես կապ չունի և այդ հանգամանքն էլ կրկին փորձում են գցել նախկինների գրպանը։

Օրեր առաջ գրել էինք, որ լուրջ խնդիրներ են սպասվում նաև այն առումով, որ ֆինանսական ոլորտի պատասխանատուները առանձին շփումներ ունեն իշխանական օլիգարխների հետ, նրանցից իրենց շահերի լոբբինգի համար, նվերներ են ստանում, և այս հանգամանքը ևս հարուցել է Փաշինյանի մերձավոր շրջապատի բուռն վրդովմունքը։ Նրանք մտածում են, որ հենց իրենք են հեղափոխությունն արել, բայց արանքում ամենաշատը օգտվում են նախկիններից մնացածները։ Չի բացառվում, որ Փաշինյանը մեկ-երկու փոփոխություն իրականացնի՝ ինչպես օրինակ ֆինանսների նախարարի, մրցակցության պաշտպանության հանձնաժողովի նախագահի և այլ պատասխանատուների, հանրության ու հատկապես կուսակիցների շրջանում բացասական լիցքերը թոթափելու համար։

Արթուր Մանուկյան