Եթե հանդիպեմ իմ չափ նվիրվող, հոգատար, առատաձեռն, հասուն տղամարդու, մեծ սիրով նրա հետ ընտանիք կկազմեմ. Սիլվի Բարկովա

Life.panoarama.am-ը գրում է.

Life.panoarama.am-ի այսօրվա զրուցակիցն է հեռուստասերիալներից հայտնի երիտասարդ դերասանուհի Սիլվի Բարկովան, ով այս շրջանում ներկայանում է «Երջանկության արցունքները» նախագծում: Իր երազանքների եւ ձգտումների, ոչ հայկական արմատների ու նոր մասնագիտության մասին դերասանուհին խոսել է Life.panoarama.am-ի հետ:

-Սիլվի, որքան ժամանակ էր, ասես դադար էիք հայտարարել, բայց բոլորովին վերջերս կրկին Ձեզ էկրաններին ենք տեսնում «Երջանկության արցունքները» նախագծում: Կպատմե՞ք դադարի պատճառների մասին:

- Դադարը երկար չէր` մի քանի ամիս: Պատրաստվում էի արտերկրի հյուրախաղերիս, այդ իսկ պատճառով էլ մի պահ ակտիվ չէի։

-Հետաքրքիր է իմանալ նաեւ, թե ինչպես ստացաք նոր նախագծի առաջարկը, առհասարակ որպես դերասանուհի սկզբունքներ ունե՞ք առաջարկներն ընդունելու հարցում:

- Հրավերն ինձ արեց նախագծի ռեժիսոր, իմ լավ ընկեր Գրիգոր Դավթյանը։ Ու քանի որ մեկնելս մի քիչ ձգձգվում էր, որոշեցի ընդունել հրավերը ու մեծ սիրով նկարահանվեցի:

-Նշել էիք, որ հիմա երկրում չե՞ք, կմանրամասնե՞ք:

- Այժմ հյուրախաղերի եմ, նաև հանգիստս եմ վայելում։ Չեմ ուզում բացել փակագծերը եւ ասել, թե որտեղ եմ, բայց մտածեցի Բոլիվուդից ավելի շուտ Հոլիվուդ կհասնեմ:  Շուտով կվերադառնամ:

-Ձեր մասին տեղեկությունները բավականին քիչ են, բայց մարդիկ սիրում են իրենց սիրելի դերասանից մանրամասներ իմանալ, եթե դեմ չեք լինի, կպատմե՞ք Ձեր մասին, նաեւ այս ասպարեզ հայտնվելու մասին: Ինչպե՞ս սկսեցիք եւ ո՞ւր եք ուզում գնալ:

- Ավարտել եմ Թատրոնի և կինոի պետական իստիտուտը` Արմեն Էլբակյանի արվեստանոցը։ Ես թատրոնի և կինոի դերասանուհի եմ, և փառք Աստծուն, երկու տեղերում էլ կամ: Ինչպես բոլոր դերասան-դերասանուհիները, ես նույնպես Հոլիվուդի ախորժակ ունեմ, բայց կհասնեմ այնտեղ, որտեղ ի սկզբանե ինձ համար նախասահմանել է Աստված։ Փորձում եմ հավատարիմ և լավը լինել նույնիսկ քչի մեջ։

-Հարց, որը գուցե շատ լսած լինեք՝ Ձեր թե արտաքինը, թե ազգանունը խոսում է այն մասին, որ արմատները միայն հայկական չեն: Կկիսվե՞ք ոչ հայկական արմատների մասին:

- Այո, այդ հարցը շատերին է հետաքրքրում: Մայրս հրեա է, նրան շատ նմանություններ ունեմ:

-Սիլվի, կարծես թե դեմ չեք, որ 2016-ը ամուսնությամբ նշանավորվի: Իսկ նա արդեն կա՞ Ձեր կյանքում: Ձեր տղամարդուց ի՞նչ «պահանջներ» ունեք, նրանից, ո՞ր հատկանիշն եք ամենաշատը կարեւորում:

- Ոչ, իմ կյանքում ոչ ոք չկա։ Եթե հանդիպեմ իմ չափ նվիրվող, զոհողությունների պատրաստ, գնահատող, հոգատար, առատաձեռն, հասուն տղամարդու, մեծ սիրով նրա հետ ընտանիք կկազմեմ:

-Սիլվի, բացի դերասանական արվեստից, էլ ի՞նչ հետաքրքրություններ ունեք:

- Այս տարի կնդունվեմ հգեբանության ֆակուլտետ: Շատ եմ ուզում այդ մասնագիտությունը ձեռք բերեմ:

-Սա հնարավո՞ր է Ձեզ հեռացնի դերասանի մասնագիտությունից:

-  Իմ կոչումը, իմ էությունը դերասանուհու մասնագիտությունն է։ Մնացած մասնագիտությունները կամ մանագիտությունը, որ կստանամ, միայն կլրացնեն կամ կլրացնի առաջինին, բայց երբեք չի հեռացնի։

-Առաջիկա ծրագրեր ու երազանքներ, մեզ հետ կկիսվե՞ք դրանց մասին:

- Առաջիկա կարևորագույն երազանքս հոգեբանի մասնագիտություն ստանալն է, որը ես պետք է ստանայի դեռ անցած տարվանից, բայց խիտ գռաֆիկի պատճառով չհաճախեցի դասերին։ Այս տարի կրկին կնդունվեմ և անպայման կհաճախեմ:

Հեղինակ՝ Անուշիկ Մելքոնյան