Յուրգեն Կլոպ․ 4 տիտղոս նվաճելը քիչ հավանական է

Անգլիական «Լիվերպուլի» գերմանացի գլխավոր մարզիչ Յուրգեն Կլոպը քիչ հավանական է համարում մեկ մրցաշրջանում 4 տիտղոս նվաճելու հավանականությունն Անգլիայում։

«Անգլիայի գավաթի կիսաեզրափակիչում «Մանչեսթեր Սիթիի» նկատմամբ մեր հաղթանակը ցույց է տալիս, որ մեկ մրցաշրջանում 4 տիտղոս նվաճելը քիչ հավանական է։ Այս ծանր հանդիպումից ընդամենը 3 օր հետո առաջնությունում մրցելու ենք «Մանչեսթեր Յունայթեդի» հետ, որն այս տուրում 3 միավոր վաստակեց, իսկ «Տոտենհեմն» ու «Արսենալը» պարտվեցին։ Երեք թիմերն էլ հավակնում են չորրորդ տեղին եւ Չեմպիոնների լիգայի ուղեգրին։ Նրանք հնարավոր ամեն ինչ կանեն այդ հնարավորությունից օգտվելու համար։

Այնուհետեւ մի քանի օր անց լիվերպուլյան դերբին է «Էվերտոնի» հետ։ Նրանց ծանր դրությունն էլ հուշում է, որ համառ պայքար է սպասվում մեզ։ Հետո «Վիլյառեալի» հետ կիսաեզրափակիչն է Չեմպիոնների լիգայում, հետո «Նյուքասլն» է, որը նույնպես պայքարում է Պրեմիեր լիգայում տեղը պահպանելու համար։

Անհավանական ծանր խաղացանկ է։ Քիչ հավանական է, որ մենք կհաղթենք այդ բոլոր հանդիպումներում։ Բայց հիմա գլխավորը լավ վերականգնվելն է եւ հաջորդ խաղին պատրաստ լինելը»,- Յուրգեն Կլոպի խոսքը մեջբերում է BBC-ն։

Անգլիայի առաջնության 30-րդ տուրից տեղափոխված «Լիվերպուլ» - «Մանչեսթեր Յունայթեդ» հանդիպումը տեղի կունենա ապրիլի 19-ին եւ կմեկնարկի Երեւանի ժամանակով 23։00-ին։

Հիշեցնենք, որ այս մրցաշրջանում «Լիվերպուլն» արդեն նվաճել է Անգլիական լիգայի գավաթը՝ փետրվարին տեղի ունեցած եզրափակիչում հետխաղային 11 մետրանոցներով պարտության մատնելով Լոնդոնի «Չելսիին»։ Պրեմիեր լիգայում «Լիվերպուլը» 1 միավոր է հետ առաջատար «Մանչեսթեր Սիթիից»։