Լիկա Սալմանյանն ու Աննա Գրիգորյանը «Դոմինո» սիթքոմում այլևս չե՞ն նկարահանվի

Life.panorama.am-ը գրում է.

Մեծանուն կոմպոզիտոր Առնո Բաբաջանյանի 95-ամյա հոբելյանի կապակցությամբ Արմենիա TV-ի հեռուստաընկերության ստեղծագործական անձնակազմի կողմից «Դոմինո»-ի եւ «Ֆուլ հաուս»-ի սիրված դերասանների համախմբման մասին Life.panorama.am-ն արդեն պատմել է, սակայն Բաբաջանյանի հեղինակած «Королева красоты»  երգի մոտիվներով նկարահանված տեսահոլովակում «Դոմինո»-ի կենտրոնական հերոսուհիներ Աննա Գրիգորյանն ու Լիկա Սալմանյանը բացակայում են, ինչը շատերին առիթ է տվել մտածելու, թե վերջիններս «Դոմինո»-ի երկրորդ եթերաշրջանում այլեւս չեն նկարահանվի:

Life.panorama.am-ն այս թեմայի շուրջ խոսել է «Դոմինո»-ի ռեժիսոր Հարութ Խալաֆյանի հետ.

«Իրականում տեսահոլովակը Արմենիա հեռուստաընկերության ստեղծագործական անձնակազմի գաղափարն ու աշխատանքն է, եւ նրանք էլ որոշել են, թե երկու սիթքոմների, ո՞ր հերոսներին հրավիրեն: Իհարկե, տեսնում ենք, որ «Դոմինո»-ի եւ «Ֆուլ հաուս»-ի բոլոր հերոսները ներառված չեն այդ աշխատանքում, ինչը շատ նորմալ է: Իմ տեղեկություններով՝ կոնկերտ Աննա Գրիգորյանն այդ օրը խիստ վատառողջ էր, դրա համար էլ չի կարողացել մասնակցել տեսահոլովակի նկարահանմանը, իսկ մնացած դերասաններից ես տեղեկություն չունեմ, քանի որ, կրկնում եմ, սա իմ նախագիծը չէր,- մեզ հետ զրույցում նշեց ռեժիսորն ու հավելեց,- Ինչ  վերաբերում Աննայի եւ Լիկայի մասնակցությանը «Դոմինո»-ի հաջորդ եթերաշրջանում, պետք է նշեմ, որ առհասարակ «Դոմինո»-ի երկրորդ եթերաշրջանի վերաբերյալ բոլոր հարցերը պետք է քննարկվեն մոտ օրերս, որից հետո միայն հասկանալի կդառնա, թե դերասանական կազմը, թե սցենարական փոփոխությունները: Ամեն դեպքում, չեմ կարծում, որ նրանք չեն լինի հաջորդ եթերաշրջանում, ոչ մի կոնկրետ քայլ ու միքտ չկա, որ նրանք չեն լինելու»:

«Դոմինո»-ն կրկին եթերում կլինի գարնան առաջին ամսին. «Հավանաբար մարտ ամսին մենք կրկին կվերադառնանք եթեր, բայց առավել մանրամասներ հայտնել չեմ կարող, քանի որ ինքս չեմ տիրապետում հավելյալ տեղեկությունների: Ամեն բան պարզ կլինի մեր համատեղ մեծ սցենարական ժողովից»,- նշեց նա:

Հարցին, թե առաջին եթերաշրջանն ավերվելուց հետո որպես ռեժիսոր սպասելիքներն ու նպատակներն արդարացվա՞ծ է համարում, Հարութ Խալաֆյանը պատասխանեց. «Այո, երբ որեւէ աշխատանք ես սկսում, առաջդ նպատակներ ես դնում ու սպասելիքներ ունենում, հետո աշխատանքի ընթացքում հասկանում ես բացթողումներդ ու դրանք շտկելով՝ արդյունքում հասկանում ես, որ սպասելիքներն արդարացված են: Մեր դեպքում էլ, թող անհամեստ չհնչի, բայց մեր սպասելիքներն ու նաեւ հեռուստաընկերության սպասելիքները, կարծում եմ, արդարացված են, եւ հաջորդ եթերաշրջանն էլ, հուսանք, նույն կերպ կընդունվի եւ նույն արդյունքը կունենանք»:

«Ես աշխատում էի նոր դերասանական խմբի հետ եւ ինձ համար շատ կարեւոր էր այն, որ ինձ հաջողվեց նրանց հետ ընդհանուր լեզու գտնել:  Ես շատ ուրախ եմ, որ այս խմբի հետ եմ աշխատում, շատ կարեւոր է այն, որ մեր համագործակցությունը ստացվեց, հուսանք շարունակությունն էլ կունենա: Մենք ընդամենը 3.5 ամիս է, ինչ եթերում ենք, իսկ հեռուստադիտողը դեռ պետք է հասցնի կապվել այս սիթքոմի հետ, ինչն էլ երեւի տեղի կունենա ժամանակի ընթացքում»,- հավելեց ռեժիսորը:

 Հեղինակ` Անուշիկ Մելքոնյան