ՀՀ սպորտի և երիտասարդության հարցերի նախարարությունն ու ԵԿՄ-ն փոխըմբռնման հուշագիր են կնքել

ՀՀ սպորտի և երիտասարդության հարցերի նախարար Գաբրիել Ղազարյանը և «Երկրապահ կամավորականների միություն» հասարակական կազմակերպության նախագահ Մանվել Գրիգորյանը հունվարի 21-ին, ստորագրել են փոխըմբռնման հուշագիր՝ ազատամարտիկների իրավական պաշտպանության հարցերի լուծման բնագավառում համագործակցության վերաբերյալ:

Ինչպես «Արմենպրես»-ին տեղեկացրին ՀՀ սպորտի և երիտասարդության հարցերի նախարարության աշխատակազմի տեղեկատվության և հասարակայնության հետ կապերի բաժնից, հուշագրի շրջանակներում նախարարությունը և ԵԿՄ-ն մշակելու և իրականացնելու են համատեղ ծրագրեր՝ երկրապահ կամավորականների, «Պատանի երկրապահ» և «Երիտասարդ երկրապահ» ակումբների անդամների համար ֆիզիկական կուլտուրայով և սպորտով զբաղվելու հավասար պայմաններ ապահովելու ուղղությամբ:

Կողմերը պայմանավորել են նաև երկրապահ կամավորականների, «Պատանի երկրապահ»  և «Երիտասարդ երկրապահ»  ակումբների անդամների և մարզական ուղղվածության ուսումնական հաստատությունների միջև համագործակցության վերաբերյալ:

Նախարար Գաբրիել Ղազարյանը ողջունել է ներկաներին և նշել, որ ՀՀ սպորտի և երիտասարդության հարցերի նախարարությունը և ԵԿՄ-ն իրականացնում են նույն գործը՝ կրթելով և դաստիարակելով առողջ ու մարտունակ սերունդ: «Սպորտի նախարարությունը դա անում է իր ենթակայության մարզադպրոցների և մարզակառույցների միջոցով, Երկրապահ կամավորների միությունը՝ իր անդամների անձնական օրինակով և, իհարկե, մանուկ երկրապահների դաստիարակման միջոցով»,- ասել է նախարարը: Նրա խոսքերով՝ բոլոր ոլորտների ներկայացուցիչներն էլ պետք է իրենց մասնագիտական կարողությ ունները և հմտությունները ներդնեն ի շահ մեր հայրենիքի կայուն զարգացման և հարատևման:«Իրականում մենք բոլորս ենք երկրապահ՝ կոչված պահելու, պահպանելու, հզորացնելու, զարգացնելու մեր հայրենիքը»,- նշել է Գ. Ղազարյանը: