Եթե ԵԽԽՎ ընդունի հակահայ զեկույցները, կդառնա կառույց, որը կողմ է տարածաշրջանում անկայունություն մտցնելուն. ԼՂ ԱԺ պատգամավոր

Tert.am-ը գրում է.

Եվրոպայի խորհրդի խորհրդարանական վեհաժողովում (ԵԽԽՎ) շրջանառության մեր դրված հակահայկական զեկույցները պատրաստվել են ու ընդունվել Ադրբեջանի ջանքերով, մասնավորապես կաշառքի, խավիարային դիվանագիտության միջոցով ազդեցություն են ունեցել այդ մարդկանց վրա: Tert.am-ի հետ զրույցում ասաց Լեռնային Ղարաբաղի Ազգային ժողովի արտաքին հարաբերությունների մշտական հանձնաժողովի նախագահի տեղակալ Դավիթ Մելքումյանը: Վերջինս նշեց, որ ԵԽԽՎ-ն, ըստ էության, արհամարհել է արցախյան կողմը, երբ առանց ԼՂ դիրքորոշումը հաշվի առնելու զեկույցներն ընդգրկել է լիագումար նիստում:

 - Հունվարի 23-ին ԵԽԽՎ-ում քննարկվել են հակահայ երկու զեկույցներ, որոնց վերաբերյալ հայտարարություն տարածեցին ԼՂ ԱԺ խմբակցությունները: Ինչպիսի՞ն պետք է լինի ԵԽԽՎ դիրքորոշումը, որպեսզի բավարարի Արցախին:

 - Ռոբերտ Ուոլթերի զեկույցը, որը ներառվել է ԵԽԽՎ լիագումար նիստում, մեզ համար անընդունելի է: Մեզ համար անընդունելի է քննարկել կամ ընդունել ցանկացած որոշում, քայլ, նախաձեռնություն, որը կվերաբերի Արցախին, բայց կշրջանցի արցախյան կողմը, չի մշակվի Արցախի մասնակցությամբ: Բազմաթիվ կոչեր եղան նրանց կողմից, ովքեր ուզում են ԼՂ հակամարտությունը խաղաղ լուծվի, բայց, այնուամենայնիվ, հարցը ներառվեց Վեհաժողովի լիագումար նիստում: Վստահ եմ, որ ԵԽԽՎ-ում կգտնվեն մարդիկ, քաղաքական ուժեր, ովքեր տեղեկացված են ԼՂ հակամարտության կարգավորման շուրջ տարվող գործընթացից և հասկանում են, որ հակամարտության կողմերից միայն մեկի շահերը սպասարկող, պաշտպանող որոշումները միայն կվնասեն խաղաղ բանակցային գործընթացը:

 - ԵԽԽՎ-ն կարող է մերժել զեկույցները, կամ հետ ուղարկել դրանք Վեհաժողովի հանձնաժողովներ՝ վերամշակելու, փոխել վերնագիրը կամ բովանդակությունը: Եթե որոշում կայացվի նորից մշակել փաստաթղթերը, Արցախը մասնակցություն կունենա՞ այդ գործընթացին:

 - Առհասարակ, մենք պատրաստ ենք ցանկացած համագործակցության: Ավելին, բազմիցս հայտարարել ենք, որ Արցախի հետ կապված խնդիրները քննարկելու համ ԼՂ հակամարտության հետ կապված որևէ հարց արծարծելուց առաջ դիմեք արցախյան կողմին: Տվյալ պարագայում նրանք արհամարհել են: Եթե Արցախի վերաբերյալ այսպես կոչված մտահոգված կամ անհանգիստ մարդիկ կան, թող դիմեն արցախյան կողմին. մեզնից ավել անհանգիստ ու մտահոգ չեն: Հարցը նրանում է, որ ԵԽԽՎ-ն, ըստ էության, փորձել է արհամարհել հակամարտության անմիջական՝ արցախյան կողմը:

 - Հայտնի է, որ ԵԽԽՎ կողմից ընդունված որոշումները իրավական ուժ չունեն:  Ի՞նչ հետևանք կունենան դրանք հակամարտության խաղաղ կարգավորման գործընթացի վրա:

 - Հակամարտության խաղաղ կարգավորման բանակցային գործընթացը վաղուց խախտված է, և նոր չէ, որ պետք է խախտվի՝ այս զեկույցների ընդունմամբ: Խախտված է՝ ադրբեջանական կողմի ջանքերով: Այդ պատճառով Արցախը պատրաստ է ցանկացած սցենարի, պատասխան տալու՝ Ադրբեջանի սադրանքներին: Եթե այդ զեկույցները դառնան բանաձև, չեմ կարծում, թե Արցախի ժողովուրդը այնպիսի վշտի մեջ կլինի, որ… Ոչ, մենք գիտենք, որ այդ զեկույցները պատրաստվել են ու ընդունվել Ադրբեջանի ջանքերով, մասնավորապես կաշառքի, խավիարային դիվանագիտության միջոցով ազդեցություն են ունեցել այդ մարդկանց վրա: Այնպես որ, բանակցային գործընթացը խախտելու խնդիր՝ չկա, որովհետև այն վաղուց է խախտված:

 - Եվրոպայի խորհուրդը օրերս ևս կոչ արեց չընդունել զեկույցները: Սա ԵԽԽՎ-ի համար վճռորոշ դեր կունենա՞, հաշի կառնվի՞:

 - Պետք է հաշվի առնվի, որովհետև ԵԱՀԿ Մինսկի խումբը միակ ձևաչափն է, որն ունի մանդատ՝ հակամարտությունը խաղաղ լուծելու համար: Եթե հիշում եք, այս մասին հայտարարություն էր արել նաև ԵԱՀԿ Մինսկի խմբի համանախագահը, ասելով, որ հարցը չպետք է տեղափոխվի հարցի լուծման մանդատ չունեցող այլ հարթակներ: Եվ եթե ԵԽԽՎ-ն, անգամ արհամարհի Եվրոպայի խորհրդի, ԵԱՀԿ Մինսկի խմբի կոչերը, զերծ մնալու՝ հարցը այլ հարթակներ տեղափոխելուց, Մինսկի խումբը մնալու է միակ ձևաչափը, որը կմասնակցի հարցի քննարկմանը, իսկ ԵԽԽՎ-ն կդառնա կառույց, որը կողմ է տարածաշրջանում անկայունություն մտցնելուն:

 - Այդ բանաձևերը կդառնան հավելյալ գործի՞ք Ադրբեջանի ձեռքում:

 - Այո, դրանք կդառնան ագրեսիվ հռետորաբանության, սադրանքների կրկնապատկման համար:

 - Ադրբեջանական մամուլում ակտիվացել են հրապարակումներն այն մասին, որ ԵԱՀԿ Մինսկի խումբն իրեն սպառել է, որ ՄԽ-ն այլևս չի արդարացնում իրեն, ինչին զուգահեռ նախագահ Իլհամ Ալիևը, Մինսկի խմբի ջանքերով կազմակերպված հանդիպումը նախագահ Սերժ Սարգսյանի հետ որակեց որպես ֆիկտիվ բնույթի հանդիպում: Ձեր կարծիքով ինչո՞ւ է Ադրբեջանը նման կեցվածք որդեգրել:

 - Ադրբեջանը դժգոհ է Մինսկի խմբից, որովհետև այդ ձևաչափը չի իրականացնում նրանց ցանկությունները: Իսկ ԵԽԽՎ-ում այս պահին նրանք տեսնում են հարթակ՝ իրագործելու ցանկությունները: Մինսկի խումբը ստեղծում է հարթակ, որ հակամարտության երկու կողմերը գան ու բանակցեն: Սա է նրանց առաքելությունը: Մինսկի խումբը միակ ձևաչափն է, որտեղ կարող է քննարկվել Ղարաբաղյան հակամարտությունը և մենք բարձր ենք գնահատում Մինսկի խմբի ջանքերը: Ուստի Ադրբեջանը փորձում է խախտել այս ձևաչափը, որովհետև ՄԽ-ն չի սպասարկում նրանց շահերը: Բացի այդ, Մինսկի խմբի հայտարարությունները դարձել են շատ ավելի հասցեական: Ճիշտ է, սա մի փոքր ուշացած էր, որովհետև մենք բազմիցս էինք խնդրում՝ ուշադրություն դարձնել հրադադարի ռեժիմը խախտող կոնկրետ կողմի վրա: