Կանադայում դպրոցականն սպանել է ուսուցչուհուն և իր եղբայրներին

Սասկաչևան նահանգի Լա Լոշ ավանի դպրոցում հրաձգություն է տեղի ունեցել, որի հետեւանքով, ըստ նախնական տեղեկությունների, մահացել է 4 մարդ: Այս մասին հայտնել է Կանադայի ոստիկանության ներկայացուցիչ Մորին Լեւին:

Մահացածների սեռն ու տարիքը նա չի նշել՝ հիմնավորելով, որ հետաքննությունը դեռ վաղ փուլում է, հաղորդում է «Ինտերֆաքսը»՝ վկայակոչելով BBC-ն:

Ոստիկանությունում ընդգծել են, որ դպրոցի տարածքում մեկ կասկածյալ է ձերբակալվել: Նրա ինքնությունը չի նշվում, լրատվամիջոցները նրան ներկայացնում են «զենքով տղա», հաղորդում է Gazeta-ն՝ վկայակոչելով CBC News-ը:

Associated Press-ի փոխանցմամբ, կրակոցներից մահացածներից մեկն այդ դպրոցի ուսուցչուհի 23-ամյա Մարի Ժանվյեն է: Նրա մահվան մասին լրագրողներին հայտնել է հայրը: Նա նաեւ պատմել է, որ զենքը դասարան բերելուց առաջ բարձր դասարանի աշակերտը տանը սպանել է իր երկու եղբայրներին:

Կանադայի վարչապետ Ջասթին Թրյուդոն տեղի ունեցածն անվանել է վերջին տարիների ամենասարսափելի ողբերգությունը:

Լա Լոշ քաղաքում կրակոցները տեղի են ունեցել տեղի ժամանակով 13.00-ի սահմաններում: Դպրոցից աշակերտները փախել են՝ բղավելով. «Փախեք, նրա ձեռքին զենք կա»: Կրակողի մասին միայն հայտնի է, որ նա սովորում է այդ դպրոցի բարձր դասարաններից մեկում: