Ադրբեջանի վարկային վարկանիշն իջեցվում է. նրան վարկ կտրվի բարձր տոկոսներով

 Այն դեպքում, երբ տնտեսական ճգնաժամում հայտնված Ադրբեջանը պատրաստվում է պարտք վերցնել արտասահմանից, Standart & Poor`s միջազգային վարկանիշային գործակալությունը հայտարարել է, որ նավթի էժանացման պատճառով Ադրբեջանի վարկային վարկանիշն իջեցվելու է, ինչը նշանակում է, որ առկա տնտեսական դժվարությունները հաղթահարելու համար արտասահմանյան ֆինանսական շուկաներից վարկեր Ադրբեջանը կարող է ներգրավել միայն ավելի բարձր տոկոսներով:

Ինչպես հաղորդում է «Արմենպրես»-ը` վկայակոչելով virtualaz.org կայքը, գործակալությունը հայտնել է, որ նավթի գնանկումն անխուսափելի է դարձնում նավթ արտահանող երկրների, այդ թվում` Ադրբեջանի վարկային վարկանիշը:

Դրանից առաջ գործակալությունը Ադրբեջանի վարկային վարկանիշը պահպանել էր BBB մակարդակի, սակայն, «կայունից» «նեգատիվի» էր իջեցրել երկարաժամկետ պարտքային վճարումների գծով նրա վերաբերյալ կանխատեսումը: Այժմ սպասվում է, որ գործակալությունը կվերանայի Ադրբեջանի հետ մի շարք երկրների վարկային վարկանիշները:

Haqqin.az կայքը հայտնում է, որ Moody's Investor Service-ն արդեն «կայունից» «նեգատիվի» է իջեցրել Ադրբեջանի առաջատար «Կապիտալ բանկի» դեպոզիտների երկարաժամկետ վարկանիշների գծով կանխատեսումը: Դա արվել է ուշադրության առնելով Ադրբեջանում մակրոտնտեսական փոփոխությունները, կախված` մանաթի լողացող փոխարժեքի անցնելու եւ դոլարիզացման բարձր մակարդակի հետ:

Փորձագետների կարծիքով` վարկերի թանկանալու այս ժամանակաշրջանում արտասահմանյան կազմակերպություններից պարտք վերցնելու փոխարեն ադրբեջանական կառավարությունը պետք է օգտվի արտարժույթի իր սեփական պահուստներից:

Ադրբեջանական ԶԼՄ-ները հայտնում են, որ դրա հետ միասին, Ադրբեջանի կենտրոնական բանկի արտարժութային պահուստները 2016 թվականի հունվարի 1-ի դրությամբ կազմել է 5,167 մլրդ դոլար, ինչը 8,741 մլրդ դոլարով կամ 2,74 անգամ փոքր է անցյալ տարվա նույն ժամանակահատվածի համար ցուցանիշի համեմատ: Անցյալ տարվա նոյեմբերի համեմատ, միայն դեկտեմբերին Ադրբեջանի ԿԲ-ի արտարժույթի պահուստները կրճատվել են 1,228 (19,67 տոկոս) դոլարով: Ադրբեջանի արտաքին պետական պարտքը 2015 թվականի նոյեմբերի վերջի դրությամբ կազմել է մոտ 7 մլրդ դոլար:

Ադրբեջանի ֆինանսների նախարար Սամիր Շարիֆովը հայտարարել է, որ 2016 թվականի հաստատված պետբյուջեն պետք է վերանայվի, որում նավթի գինը      մեկ բարելի դիմաց հաշվառվել է 50 դոլարի մակարդակի: Նրա խոսքով` նախարարությունը պետբյուջեի նոր նախագիծ է պատրաստում, որում նավթի գինը պետք է հաշվարկվի մեկ բարելի դիմաց 25 դոլար: