Ինչու է Հայաստանին անհրաժեշտ ուռուցքաբանական հիվանդների ռեեստր ունենալը

Ուռուցքաբանական հիվանդների ռեեստր ունենալն անհրաժեշտ է բոլոր այն երկրներին, որոնք առողջաապահական զարգացած համակարգ ունեն, քանի որ այն կարող է զգալիորեն օգնել թե բժիշկներին, թե առողջապահության ոլորտի մասնագետներին: NEWS.am Medicine-ի թղթակցի հետ զրույցում նման տեսակետ են հայտնել Ակհիլա Աննամրեդդին ու Ջոն Սքոթը Հարվորդի հանրային առողջապահության դպրոցից:

Ո՞րն է նման մատյանի իմաստը ու ինչո՞ւ է այն անհրաժեշտ:

Ինչպես նշեց Ակհիլա Աննամրեդդին, լիարժեք ռեեստրը պետք է մանրակրկիտ տեղեկությունենր պարունակի բոլոր հիվանդների մասին, որոնց մոտ որեւէ ուռուցքաբանական հիվանդություն է ախտորոշվել: Դա չպետք է լինի ընդամենը հիվանդացության վիճակագրություն՝ տարիքի ու սեռի մասին նշումներով, այլ պետք է պարունակի տեղեկություններ տվյալ մարդու, նրա կենսակերպի ( օրինակ ծխում է, թե ոչ, ռիսկի որեւէ այլ գործոն ունի, թե ոչ ) բնակության ու աշխատանքի վայրերի մասին:

Առաջին հայացքից այս տեղեկությունները կարող են այդքան էլ կարեւոր չթվալ, բայց իրականում դրանք ծայրաստիճան կարեւոր են: Ինչպես նշեց Ջոն Սքոթը, նման ռեեստրի շնորհիվ մասնագետները կարող են օրինակ նկատել, որ քաղցկեղի այս կամ այն տեսակով հիվանդացությունը ավելի բարձր է որոշակի տարածքում կամ մարդկանց որոշակի խմբում: Դա մասնագետներին հնարավորություն կտա հասկանալ, թե ինչն է միավորում այդ բոլոր մարդկանց ու թե տվյալ տարածքում ինչը կարող է քաղցկեղածին ներգործություն ունենալ ( օրինակ մոտակայքում վտանգավոր հանքավայրեր կան կամ լուրջ բնապահպանական խնդիր): Այդ ամենի ըմբռնումը կարող է օգնել ոչ միայն քաղցեղի բուժմանը այլեւ կանխարգելմանը ու նվազեցնել դրանից մահացությունը: Միեւնույն ժամանակ, առանց այդ ամբողջ տեղեկությունների կանխարգելում կազմակերպելը բավականին բարդ է:

Ակհիլա Աննամրեդդին ու Ջոն Սքոթը նաեւ նշեցին, որ իրենց ունեցած տվյալներով՝ ՀՀ Առողջապահության նախարարությունն արդեն աշխատում է ուռուցքաբանական հիվանդների մանրակրկիտ գրանցամատյան ստեղծելու ուղղությամբ, ու դա մեծ քայլ կլինի երկրում քաղցկեղի բուժման ու կանխարգելման բարելավման գործում: