«Դրսի» լրատվամիջոցները լուսաբանում են հայ-ադրբեջանական կոնֆլիկտը

Շուտով ջեռուցման սեզոնն է, իսկ էլ. էներգիայի համար վճարում եք չափազանց շատ։ Իսկ դուք գիտե՞ք, որ այսուհետ էլ. էներգիան յուրաքանչյուր ընտանիքում կարող է լինել անվճար։ Սեղմեք և ծանոթացեք պայմաններին` ԱՅՍՏԵՂ

Սեպտեմբերի 13-ի կեսգիշերից լարվածություն է սկսվել հայ-ադրբեջանական սահմանին։ Մինչ այս պահը թեեւ որոշակի ջանքեր ներդրվել են, հիմնականում՝ դիվանագիտական, սակայն իրավիճակը կայունացնել հնարավոր չի եղել։ Բախումները, բնականաբար, գրավել են տարածաշրջանային եւ համաշխարհային առաջատար լրատվամիջոցների ուշադրությունը։ 

Ռուսական լրատվական սեգմենտում հիմնականում հրապարակում են թե՛ հայկական, թե՛ ադրբեջանական պաշտոնական լրահոսում տեղ գտած հաղորդագրությունները, ինչպես նաեւ՝ ռուսական պետական մարմինների կամ պետական գործիչների, քաղաքական գործիչների հայտարարություններն այս առնչությամբ։ Իհարկե, որոշակի ադրբեջանամետ կեցվածքով աչքի է ընկնում ՏԱՍՍ-ը։ Ռուսական մեդիադաշտի յուրահատկություններից է նաեւ այն, որ, օրինակ, առաջին օրը` ողջ օրվա ընթացքում, այս բախումները մնացին երկրորդ պլանում, իսկ ուկրաինական թեման շարունակում էր մնալ առաջնային։ Միայն առաջին օրը` ուշ երեկոյից սկսած, ու նաեւ երեկ այս թեմայի հանդեպ ուշադրությունը մի փոքր ավելացավ։

Ադրբեջանական լրատվական սեգմենտում, բնականաբար, ամեն բան ներկայացվում է ըստ Բաքվի պաշտոնական տեսակետի։ Ուշագրավ է այն, որ այստեղ ադրբեջանական կեցվածքին համահունչ են խոսում նաեւ այն ռուս մեկնաբաններն ու վերլուծաբանները, ինչպիսիք, օրինակ, Իգոր Կորոտչենկոն է եւ Մաքսիմ Շեւչենկոն, ովքեր ավանդաբար հայտնի են եղել իրենց ադրբեջանամետ կեցվածքով եւ սնվել են ռուսաստանյան ադրբեջանական լոբբիստական կառույցներից։ 
Թուրքական մամուլը, բնականաբար, աջակցում է Ադրբեջանին, ինչպես որ Թուրքիա  պետությունն այս երկու օրվա ընթացքում տարբեր կալիբրի պաշտոնյաների միջոցով հայտարարել է, որ Ադրբեջանի կողքին է եւ այլն։ 

Արեւմտյան լրատվամիջոցները՝ BBC, DW, Euronews եւ այլն, հիմնականում հրապարակում են երկու կողմերի պաշտոնական հաղորդագրությունները, մյուս կողմից՝ նաեւ ներկայացնում այն մտավախությունները, որ բախումը կարող է վերաճել լայնածավալ հակամարտության, որն այժմ ոչ մի կերպ Արեւմուտքին, հատկապես՝ Եվրոպային, պետք չէ, քանի որ Հարավային Կովկասը ռուս-ուկրաինական հակամարտության ներկա փուլում վերածվել է նավթագազային միջանցքի։ Իսկ Եվրոպան այժմ էներգետիկ ճգնաժամի մեջ է ու առանձնապես լավ օրեր չի ապրում։ Եվ, ըստ այդմ, չի ուզենա նեղացնել Ադրբեջանին, իսկ պաշտպանել` չի կարող:

Իհարկե, նաեւ նշվում է, որ այս բախումները եթե վերաճեն հակամարտության, կարող են դրա մեջ ներքաշել նաեւ Ռուսաստանին ու Թուրքիային։