Life.panorama.am-ը գրում է.
Հայկական ֆիլմարտադրության մեջ հատկապես վերջին տարիներին բանակի մասին ֆիլմեր կամ նախագծեր շատ են հանդիպում: Դրանցում տեսնում ենք հայ զինվորների կյանքը, որոնց հաճախ մարմնավորում են մարդիկ, ովքեր իրականում ինչ-ինչ պատճառներով զինվորական ծառայություն չեն անցել: Նրանցից երկուսը՝ Գնել Ուլիխանյանն ու Գոռ Հարությունյանը, կիսվել են նման ֆիլմերում նկարահանվելու փորձով եւ թեկուզ, որպես դերասան, զինվորի հոգեվիճակն ապրելու իրենց զգացողություններով:
Գնել Ուլիխանյանը, ով «Ես եմ» ֆիլմում մարմնավորում էր զինվոր Ռոմանին, այս շրջանում կապիտան Մովսիսյանի դերով խաղում է «Սահմանին» ֆիլմում. «Ես չեմ ծառայել, բայց հայրենիքիս նկատմամբ պարտքս փորձում եմ կատարել զիվորական թեմաներով ֆիլմերում նկարահանվելով: Խաղացել եմ «Ես եմ» գեղարվեստական ֆիլմում, իսկ հիմա էլ՝ «Սահմանին» բազմասերիանոց ֆիլմում: Իսկապես հպարտ եմ, որ ինձ վստահում են նման ֆիլմերում խաղալ, թեկուզ որպես դերասան, զինվորի կյանքը ներկայացնելով, շատ բան եմ սովորել: Նկարահանումների ընթացքում աշխատում եմ հնարավորինս շատ մտնել զինվորի, սպայի կերպարի մեջ. հպարտանալու առիթ է նույնիսկ մի պահ քեզ սպա զգալ»,-Life.panorama.am-ի հետ զրույցում պատմեց դերասանը:
Գնելը երբեք իրական զինվոր չի եղել, բայց զինվոր ընկերներ շատ է ունեցել. «Ընկերներիցս Լեւս Դավթյանն ու Մոսո Կարապետյանն են ծառայել, ես էլ իրենց ամբողջ ծառայության ընթացքում հոգեպես տղերքի հետ եմ եղել»,- նկատեց Գնելը:
Դերասանը մեր միջոցով հղեց նաեւ իր շնորհավորանքը. «Մեր բանակը ամենահզորն է, չէ, որ պատերազմը հաղթած բանակ է: Ուզում եմ բոլորիս շնորհավորել այս օրվա կապակցությամբ, մեր հայրենիքին խաղաղ երկինք եմ մաղթում, զինվորներին քաջ առողջություն, անփորձանք ծառայություն, թող Աստծո աջը միշտ լինի մեր սահմանապահ զինվորների գլխին. թող, որ լռեն զենքերը, ուրախ հնչեն երգերը»:
Դե իսկ երգիչ-դերասան Գոռ Հարությունյանը՝ «Բանակում»-ի Վարուժը, մեզ հետ զրույցում պատմեց, որ «Բանակում» հեռուստասերիալի ողջ ընթացքում փորձել է հասկանալ ու վերապրել զինվորի կյանքը: Ի դեպ՝ որպես երգիչ Գոռն իր առաջին տեսահոլովակը նկարահանել է հենց բանակային թեմայով, որում հանդես է եկել որպես շարքային Հարությունյան.
«Առաջին հերթին սահմանին կանգնած մեր զինվերներին, ու առհասարակ բոլոր զինվորներին, սպաներին, գնդապետներին ու գեներալներին մաղթում եմ առողջություն ու խաղաղ ծառայություն, Աստված պահապան թող լինի բոլոր զինվորներին եւ նրանց ընտանիքներին: Թող մեր զինվորները միշտ կուշտ լինեն, չմրսեն ու տոկուն լինեն, ամենակարեւորը՝ կորուստներ չունենանք, որ ոչ մի սգավոր մայր չլինի,- նշեց Գոռն ու ավելացրեց,- ես բանակում չեմ ծառայել, բայց եղբորս ծառայության ու «Բանակում» հեռուստասերիալում խաղալու շնորհիվ բանակային կյանքը շատ լավ գիտեմ: Բանակը սովորեցնում է ավելի ճիշտ ընկեր եւ մարդ լինել, ավելի խորը գիտակցել, որ ընկերոջդ կողքին պետք է լինես, նրան ատամներով պահես, անկախ նրանից՝ նա քո մտերիմն է, թե ոչ, չէ՞ որ բոլորս էլ հայ ենք: Մեր հայրենիքը մեր մեծ ընտանիքն է, այն պետք է պահել ու պաշտպանել: Այս գիտակցումը զինվորները շատ ավելի լավ են հասկնում, իսկ ես էլ փորձել եմ այդ ամենը ավելի խորը ընկալել՝ ֆիլմում զինվորի մարմնավորելով»:
1
2
3
4
5
1
5
2
3
4
5
