Քեթրին Քուքի «Ծառերի հիշողություն»-ը ներկայացվում է Կոմիտասի թանգարան- ինստիտուտում

 Հայոց ցեղասպանության անշունչ և շնչավոր ականատեսներն, անխոս վկա դարձած տեղանքն ու վերապրածներն ամփոփվել են մեկ ցուցահանդեսում: Կոմիտասի թանգարան-ինստիտուտում ներկայացվեց ամերիկացի լուսանկարիչ Քեթրին Քուքի «Ծառերի հիշողություն» լուսանկարչական ցուցադրությունը:

«Ամերիկացի Քեթրին Քուքը 2006-ից Ստամբուլ է տեղափոխվել, եղել տարբեր երկրներում և աշխատանք է կատարել Հայոց ցեղասպանության մասին: Նա 7 տարվա ընթացքում շրջել է տարբեր երկրներով, և երբ ավարտեց, Մարսելի թանգարանում անհատական ցուցահանդես ունեցավ»,-«Արմենպրես»-ի փոխանցմամբ` լրագրողների հետ զրույցում նշեց ցուցահանդեսի համադրող Նաիրի Խաչատուրյանը:

Լուսանկարչուհին կտրել է տարբեր երկրների սահմաններ՝ Թուրքիա, Սիրիա, Լիբանան, Հայաստան, Իսրայել, Ֆրանսիա, լուսանկարներ կատարել, որպեսզի ամբողջությամբ ըմբռնի այսօրվա քար լռության և անհաղորդ անտարբերության չափը։

Քեթրին Քուքն իր նախագծի հիմնաքարը գտնում է Թուրքիայի Աղաչլը գյուղում։ Այնտեղ քուրդ բնակիչները վերականգնել են հայերի մետաքսագործական ավանդույթը` նույնությամբ մշակելով և օգտագործելով տեղի թթենիների շերամը։ Քեթրին Քուքի արած մետաքսի բոժոժների լուսանկարները ներկայանում են որպես բանաստեղծական պատկերներ` խորհրդանշելով վերածնունդը:

Արդյունքում` թանգարան-ինստիտուտում ներկայացված է 30 լուսանկար ներառող ցուցահանդեսը, որն անցկացվում է մշակութային հաստատության մեկամյա տարեդարձի առթիվ: «Ծառերի հիշողություն» լուսանկարչական ցուցադրությունը կգործի մինչև ապրիլի 29-ը:

Նշանակալից օրվա կապակցությամբ Կոմիտասի թանգարան-ինստիտուտում հունվարի 29-ին կազմակերպվեց նաև դաշնակահար, ՀՀ վաստակավոր արտիստ Հայկ Մելիքյանի մենահամերգը:

Ամերիկուհի լուսանկարիչ Քեթրին Քուքը ծնվել է 1979 թվականին։ Մեծացել է Նյու Մեքսիկոյում: Իր մասնագիտական աշխատանքն սկսել է 2003-­ին Պանամայում՝ Associated Press ընկերությունում։ Երկու տարի անց հեռացել է ընկերությունից, որպեսզի նվիրվի իր անձնական նախագծերին։ 2006-­ից սկսած ծրագրերը կենտրոնացրել է ցեղասպանություն կատարած պետությունների վրա` Թուրքիա, Մերձավոր Արևելք և Ռուանդա։ 2006-­ին Քուքը տեղափոխվել է Ստամբուլ, որտեղ սկսել է աշխատել Հայոց ցեղասպանության թեմայով երկարաժամկետ ծրագրի վրա: Նրա լուսանկարները հրապարակվել են միջազգային տարբեր թեր թերում և ամսագրերում ։