ԵԿՄ-ականները ոտքի են կանգնել. նրանք ընտրակեղծիքներ թույլ չեն տա
Այսօր Աբովյան քաղաքում տեղի ունեցող իրադարձությունները բուռն էին ու հետաքրքիր: ԵԿՄ անդամները, ԵԿՄ Կոտայքի մարզային ներկայացուցիչների հետ հավաքվելով քաղաքային գրասենյակում, քննարկում էին Աբովյանի քաղաքապետի ընտրություններում իրենց դիրքորոշման հարցը:
Ինչպես արդեն տեղեկացրել էինք, Կոտայքի մարզային կառույցը օրեր առաջ հայտարարել էր, որ իրենք ընտրություններում սատարելու են քաղաքապետի թեկնածու Վահագն Գևորգյանին, սակայն նկատենք, որ Աբովյանի քաղաքային միությունը հարցի հետ կապված այլ տեսակետ ունի. նրանք որոշել են սատարել Արթուր Հարությունյանին՝ Պալաչին:
Քաղաքական ինտրիգների եւ բրազիլական սցենարով զարգացող իրադարձությունների հետ կապված՝ Orer.am-ը զրուցեց ԵԿՄ անդամների եւ Աբովյան քաղաքի բնակիչների հետ:
ԵԿՄ-ի խորհրդի անդամ Պարգեւ Գրիգորյանը նախ նշեց, որ իրենց կառույցի անունից տարածված տեղեկատվությունը հերթական սուտն է. «Մեր անունից սուտ տեղեկություններ են տարածել, թե իբր մենք սատարելու ենք ինչ որ թեկնածուի, ում հովանավորյալն է ԲՀԿ նախկին նախագահ Գագիկ Ծառուկյանը, սակայն դա այդպես չէ: Նման բան չի կարող լինել, քանի որ Ծառուկյանը ոչ վաղ անցյալում անհնազանդության կոչ արեց:
Ինչ վերաբերում է Արթուր Հարությունյանին, ապա ասեմ, որ արդեն մոտ հինգ տարի է նա ամեն հարցով մեզ սատար է կանգնում: Մենք նրան ենք հավանություն տալիս, քանի որ նա մեր երկրի նախագահի գաղափարները կիսող եւ նրան հավատարիմ մարդ է»:
Խոսելով չքաղաքականացված կառույցի շուրջ հյուսված քաղաքական «մուտիլովկաների» մասին՝ ԵԿՄ անդամը հավելեց. «Մենք տեր ենք մեր սկզբունքներին. մեր զորավարն արգելել է զբաղվել քաղաքականությամբ, սակայն դա չի նշանակում, որ մենք թույլ կտանք, որ ոմանք դիմեն ընտրակեղծիքների: Մենք վերջ ենք դնելու անօրինականությանը. «Երկրապահը» կանգնելու է արդարության կողքին եւ թույլ չի տալու որեւէ ոտնձգություն՝ անկախ նրանից, թե որ թեկնածուն կանցնի»:
Հարցին, թե ինչու է Աբովյանի ինքնահռչակ «մեծն թագավոր» Ծառուկյանը դիմել այնպիսի մանր-մունր եւ էժանագին քայլերի, ինչպիսին է Արթուր Հարությունյանի «կրկնօրինակի» պատրաստումը, Պարգեւ Գրիգորյանը պատասխանեց. «Նրանք այդ քայլով ցույց տվեցին իրենց թույլ լինելը: Փաստորեն, ընտրությունը դեռ չսկսած, նրանք դիմում են կեղծիքների՞»:
Պարզվում է՝ կեղծ կերպարներ ստեղծելուց եւ վատ ներկայացումներ ցուցադրելուց բացի՝ ԲՀԿ նախկին նախագահ, այսպես կոչված բարերարը, ով հանուն ժողովրդի պատրաստ էր անգամ սիրտը հանել եւ ջահ սարքել ինչպես Դանկոն, այժմ անցել է ավելի կոշտ եւ անմարդկային գործելաոճի:
Աբովյան քաղաքի բնակչուհի Գայանե Ղաղալբակունցն էլ նշեց. «Պետական աշխատողներին վախեցրել են, մարդիկ ահուսարսափի մեջ են, նրանց աշխատանքից ազատում են: Չեմ հասկանում, թե մարդկանց ինչու՞ են աշխատանքից հանում, որ իրենց ձայնը պատրաստվում են տալ Արթուրի՞ն` Պալաչի՞ն: Ժողովուրդը լավ գիտի, որ եթե մեր քաղաքապետն Արթուրը դառնա՝ մենք շատ լավ կապրենք այս քաղաքում: Թող մարդիկ լավ իմանան, որ այս քաղաքը որեւէ մեկի սեփականությունը չէ»:
Սոսե Չանդոյան
Տեսանյութի հեղինակ՝ Աննա Հարությունյան (Անն Էքսուս)
1
2
3
4
5
3
4
5
2
3
4
5
