Դորտմունդի «Բորուսիա»-ն դժվարին հաղթանակ տարավ «Ինգոլշտադտ»-ի նկատմամբ

Դորտմունդի «Բորուսիա»-ն Բունդեսլիգայի 2015-2016 մրցաշրջանի 19 -րդ տուրի հանդիպումը անցկացրեց «Սիգնալ Իդունա Պարկ» մարզադաշտում՝ իր հարկի տակ ընդունելով «Ինգոլշտադտ 04» թիմին, և հաղթեց 2:0 հաշվով:   

Ինչպես հաղորդում է «Արմենպրես»-ը, ֆուտբոլի Հայաստանի հավաքականի ավագ և «Բորուսիա Դորտմունդ» ակումբի հարձակվողական ոճի կիսապաշտպան Հենրիխ Մխիթարյանը հայտավորված էր մեկնարկային կազմում և դաշտում անցկացրեց խաղի բոլոր  90 րոպեները:

 

Թոմաս Տուխելը փոխել է մարտավարությունը խաղից րոպեներ առաջ: Հայտարարված 4-1-2-2-1 դասավորվածության փոխարեն  դորտմունդցիները դուրս եկան խաղադաշտ 4-2-3-1 դասավորվածությամբ: 

 

Տուխելը ասուլիսի ժամանակ հայտարարել էր, որ իր թիմը պիտի արագ տեմպ և ռիթմիկա հաղորդի խաղին: Դրա համար նախ անհրաժեշտ էր հասկանալ, թե ինչպես կխաղա հակառակորդը: «Ինգոլշտադտ 04»-ն այս անգամ ևս փակել էր դաշտի բոլոր հատվածները: Մխիթարյանը հսկվում էր ամենաքիչը երկու պաշտպանների կողմից: Գյունդողանի, Շմելցերի և Ռոյսի  բացակայությունը խիստ զգացնել էր տալիս: Առաջին խաղակեսում դորտմունդցիները կարողացան խաղի տեմպը փոխել միայն 42-րդ րոպեին: Ադրիան Ռամոսը, ով խաղում էր Ռոյսի փոխարեն, կրկին ոչինչ չկարողացավ անել թիմին օգտակար լինելու համար:  

 

Երկրորդ խաղակեսը շարունակվեց հորդառատ անձրևի ուղեկցությամբ: Եղանակային պայմանները խանգարում էին թիմերին ցուցադրել տեսարժան խաղ:

68-րդ րոպեին Ադրիան Ռամոսը, ով խաղի ընթացքում գնդակին դիպավ 42 անգամ, սակայն կատարած փոխանցումներով ամենաանարդյունավետն էր, փոխարինվեց: Ամերիկացի 17-ամյա կիսապաշտպան Քրիստիան Մատե Պելուշիչը ակտիվացրեց խաղը, ու նաև դրա շնորհիվ ինը րոպե անց Պիեր-Էմերիկ Օբամեյանգը բացեց խաղի հաշիվը: Այնուհետև, ևս ինը րոպե անց, Գոնսալո Կաստրոյի փոխանցումից հետո նույն Օբամեյանգը կրկնապատկեց այն: 

 

Նշենք, որ վերոհիշյալ խաղում Հենրիխ Մխիթարյանը  81-րդ րոպեին ստացավ իր երրորդ դեղին քարտը այս մրցաշրջանում: 

Այսպիսով, Օբամեյանգը շարունակում է գլխավորել Բունդեսլիգայի ռմբարկուների ցուցակը ընթացիկ մրցաշրջանում՝ խփելով իր 20-րդ գոլը և 3 գնդակով առաջ անցանելով Մյունխենի  «Բավարիա»-ի հարձակվող Ռոբերտ Լևանդովսկիից: Իսկ Մխիթարյանը  ամենաշատ՝ 9 գոլային փախանցում է կատարել: 8 գոլային փոխանցում ունի Ռաֆայելը՝  «Մյունխենգլադբախ» -ի հարձակվող, և 7 գոլային փոխանցում է կատարել «Բավարիա» -ի կիսապաշտպան Դուգլաս Կոստան: