Համաշխարհային մեդիայում Արցախի մասին հիշատակումներն ավելանում են՝ շնորհիվ պետնախարար Ռուբեն Վարդանյանի

«Արցախի ժողովուրդը չի տեսնում իր ապագան Ադրբեջանի կազմում և այդ մասին իր հստակ դիրքորոշումը վաղուց է հայտնել»,- այդ մասին ֆեյսբուքյան իր էջում գրել է Արցախի պետնախարար Ռուբեն Վարդանյանը։

Նրա խոսքով Ադրբեջանը ևս պետք է հասկանա և ընդունի, որ խաղաղության հասնելու միակ տարբերակը նույն տարածաշրջանում կողք կողքի, բայց ոչ միասին ապրելն է։

Վարդանյանը նշել է, որ հարցազրույց է տվել Գերմանիայի հանրային ZDF հեռուստաալիքին, որը ծավալուն ռեպորտաժով անդրադարձել է Հայաստանին և Արցախին՝ մասնավորապես սեպտեմբերի 13-ի ադրբեջանական ագրեսիայի և դրա հետևանքներին, ինչպես նաև կադրեր հրապարակել հոկտեմբերին Ստեփանակերտի Վերածննդի հրապարակում տեղի ունեցած բազմահազարանոց հանրահավաքից։

«Համաշխարհային լրատվամիջոցների ուշադրությունն ադրբեջանաղարաբաղյան հակամարտության նկատմամբ ողջունելի է»,- փաստում է Արցախի պետնախարարը։ Ընդ որում նշենք, որ պետնախարար նշանակվելուց հետո Արցախի նկատմամբ ուշադրությունը զգալի ավելացել է թե՛ ռուսական մեդիայում և թե՛ արևմտյան մեդիայում։

Եթե նախկինում առաջատար հեռուստաընկերությունները առանձնապես ջանք չէին գործադրում անդրադառնալու Արցախին, կամ էլ հիշատակում էին միայն Ադրբեջանի հերթական ռազմական ագրեսիայի դեպքում, ապա Ռուբեն Վարդանյանի՝ Արցախի պետնախարար նշանակվելուց հետո, միտումները բոլորովին հակառակն էին և դրական։

Ըստ էության, օգտագործելով իր անձնական կապերն ու ծանոթությունները, թե՛ Ռուսաստանում, և թե՛ արտերկրում, Արցախի պետնախարարին հաջողվում է որոշակիորեն բեկել իրավիճակը, համաշխարհային հանրությանը ծանոթացնել Արցախում ստեղծված իրավիճակի հետ, ներկայացնել թե ինչ խնդիրներ ունեն Ադրբեջանի ռազմական ագրեսիային ենթարկվող արցախցիները։

Եվ հարկ է, որ այս գործին Ռուբեն Վարդանյանից բացի աջակցեն նաև Հայաստանի և Արցախի իշխանությունները, թեև սովորական խանդը թույլ չի տա նրանց համախմբվելու կենսական նշանակության այս հարցի շուրջ։ Ամեն դեպքում պետնախարարն այլևս ապացուցել է, որ կարող է լրջագույն փոփոխություններ իրականացնել թե՛ Արցախում և թե՛ Արցախից դուրս՝ ի շահ Լեռնային Ղարաբաղի Հանրապետության։

Սերինե Բադալյան