Փաշինյանական վարչախումբը մնացել է տարատեսակ խառնակիչների հույսին

Գործող իշխանությունները 44-օրյա պատերազմից հետո ամենավտանգավոր և կեղտոտ նարատիվներն են առաջ տանում՝ սեպ խրելով Արցախի և Հայաստանի միջև նրա համար օգտագործելով ամենավարկաբեկված կերպարներին։

Իրեն քաղաքագետ հորջորջող մի երևույթ՝ Էդուարդ Անտինյան անունով, վերջին շրջանում դարձել է փաշինյանական վարչախմբի ամենամոլեգին սպասարկուներից մեկը։ Ժամանակին փորձելով հայտնվել գործող ընդդիմության շարքերում և հաջողության չհասնելով՝ Անտինյանն այժմ էլ փրփուրը բերանին լուտտանքներ և վիրավորանքներ է տարածում Արցախի և Արցախի իշխանությունների հասցեին։

Չի խորշում ամենակեղտոտ բնութագրումները տալ պատերազմից տուժած մեր հայրենիքի մի մասի ներկայացուցիչների նկատմամբ։ Վերջին շրջանում էլ Անտինյանի թիրախում է հայտնվել Արցախի պետնախարար Ռուբեն Վարդանյանը։

1in.am-ի եթերում Անտինյանը երեկ հայտարարել է, թե Ռուբեն Վարդանյանը Արցախի Ժիրինովսկին է և ամեն ինչ անում է, որ Հայաստանը վերջնականապես կտրի Արցախից։ «Վայ քաղաքագետի» լպիրշությունը հասել է այն աստիճանի, որ հայտարարել է, թե Ռուսաստանը պլանավորում է Հայաստանը և Արցախը թշնամացնել իրար հետ, Արցախի բնակչությանը մեղադրել է լուռ համաձայնությամբ Ադրբեջանին հանձնվելու մեջ։

Որ Էդուարդ Անտինյանը բավական պատրաստված խառնակիչ է, լայն հասարակությանը հայտնի է շատ վաղուց։ Դեռևս 2011 թվականի օգոստոսին «Ռամկավար ազատական» կուսակցությունը արտահերթ պատգամավորական ժողով էր գումարել և որոշել էր կուսակցության շարքերից վտարել Անտինյանին՝ հիմք ընդունելով նրա իրականացրած անօրինականությունները։

Համագումարը ՀՌԱԿ ատենապետ էր ընտրել Հարություն Առաքելյանին, ամիսներ շարունակ Անտինյանը, սակայն, օգտվելով օրվա իշխանությունների բարեհաճությունից, հրաժարվում էր ատենապետի պաշտոնը և համապատասխան փաստաթղթերը վերադարձնել կուսակցությանը, ամեն ինչ անում պառակտելու ՀՌԱԿ-ը։

Ի վերջո Հարություն Առաքելյանը նույնիսկ ասուլիս էր տվել և բառացի հայտարարել. «Մենք հասկացանք, որ էս տղայի՝ Անտինյանի, կամ հոգեկանը խանգարվել ա, կամ էլ կաշառել են, իմ տպավորությամբ ընենց են կաշառել, որ քյալեն թափելա»,- ասել էր Առաքելյանը։

Իհարկե, Էդուարդ Անտինյանին չհաջողվեց պառակտել ՀՌԱԿ-ը, սակայն այդ կուսակցությունը այնպես թուլացավ, որ այժմ բացարձակապես որևէ ազդեցություն չունի Հայաստանի քաղաքական դաշտում։ Զարմանալի չէ, որ փաշինյանական վարչախումբը արցախցիների և Արցախի պետնախարարի դեմ իր հարձակումների համար օգտագործում է նման հետագիծ ունեցող և վարկաբեկված արարածների։ «Նմանը զնմանին գտանե»,- աստվածաշնչյան այս արտահայտությունը լիովին բնութագրում է Անտինյաններին ու Փաշինյաններին։

Սերինե Բադալյան