Ռուբեն Վարդանյանը պատվով է կատարում իր առաքելությունը

Ադրբեջանի կողմից Լաչինի միջանցքի փակումը և Արցախում ստեղծված էքստրեմալ, սոցիալ-տնտեսական ու քաղաքական իրավիճակը նաև սրել է բացասական բազմաթիվ երևույթներ, ինչը կանխելու մեջ թերևս ամենամեծ պատասխանատվությունն ունի պետնախարար Ռուբեն Վարդանյանը։

Վերջինս պատվով է իրականացնում այդ աշխատանքը և Ստեփանակերտից հնչող ազդակները վկայում են, որ Ռուբեն Վարդանյանը լրջորեն տիրապետում է իրավիճակին։ Երեկ նա հայտարարել է, թե անձնական զանգերով և անձնական խնդրանքներով ոչ մի հարց չի լուծվելու։

Ֆեյսբուքի իր էջում ուղիղ եթերում, Արցախի պետնախարարը նշել է, թե մարդկանց մեծամասնությունը գիտակցում է Արցախում ստեղծված իրավիճակը, ցավոք սրտի կան մարդիկ ավելի շատ ունևորների կողմից, որոնք չեն հասկանում, որ անձնական զանգերով կամ անձնական խնդրանքներով ոչ մի հարց չի լուծվելու։

«Բոլորի նկատմամբ նույն մոտեցումն է լինելու, ես գիտեմ դեպքեր, որոնք անթույլատրելի են և թույլ չեմ տալու դա շարունակվի, մարդիկ պատիժ են կրելու, եթե օգտագործելով իրենց հնարավորությունները փորձեն ինչ-որ հարցեր լուծել»,- նշել է պետնախարարը՝ մասնավորապես արձանագրելով, որ մի քանի տեղերում փորձել են գները բարձրացնել ՝օգտվելով ստեղծված իրավիճակից։

Իսկ արդեն օպերատիվ շտաբի ընդլայնված աշխատանքային խորհրդակցության ժամանակ Ռուբեն Վարդանյանը նշել է, թե օրենքի առաջ բոլորը հավասար են, զբաղեցրած պաշտոնը չի կարող առավելություն տալ որևէ հարց լուծելու, միայն այս մոտեցմամբ է հնարավոր հաղթահարել մարտահրավերները ինչպես նաև անարդարության զգացողությունը։

Քննարկել են սննդամթերքի, վառելիքի, դեղորայքի և առաջին անհրաժեշտության մյուս ապրանքների առկա պաշարների ընթացիկ իրավիճակը։ Պետնախարարն անթույլատրելի է համարել որոշ տնտեսվարողների կողմից նման բարդ իրավիճակն օգտագործելով ապրանքների գների անհարկի բարձրացումները և նշել, որ բոլոր միջոցները կիրառելու է չարամիտներին պատժելու համար։

Ըստ էության, այս ամենը վկայում է , որ պետնախարարը բավականին լուրջ է մոտենում իր աշխատանքին և հրաշալի տիրապետում իրավիճակին։

Ստեփանակերտի մեր աղբյուրի փոխանցմամբ՝ արդեն իսկ կան որոշ անձինք, որոնք լուրջ խնդիրների են բախվելու։ Վարդանյանը փակել է պատմության արատավոր այն էջը, երբ շատերը կարողանում էին օգտագործել իրենց հնարավորությունները և արտոնություններ ստանալ Արցախի մյուս բնակիչների նկատմամբ։ Ի վերջո պատերազմական երկրում միայն այս կերպ է հնարավոր լուրջ արդյունքներ գրանցել։

Սարգիս Գոգինյան