«Ղարաբաղի վարչապետ Վարդանյանը հորդորել է ռուս խաղաղապահներին տասնյակ տարիներ պահել տարածաշրջանում»

Kommersant.ru–ն գրում է, որ Ստեփանակերտում կայացած մամուլի ասուլիսում չճանաչված Լեռնային Ղարաբաղի Հանրապետության կառավարության ղեկավար և ռուս նախկին գործարար Ռուբեն Վարդանյանը պարզաբանել է, որ համաձայն չէ ռուսական խաղաղապահ առաքելության քննադատությանը, որը պարբերաբար հնչում է Երևանից։
«Ռուս խաղաղապահներն իսկապես ծանր վիճակում են,- ասել է նա,- հնարավորություններ կան հստակեցնելու նրանց մանդատը, որպեսզի ավելի մեծ կոնտինգենտ լինի: Բայց եթե նրանք չլինեին, մենք ավելի ծանր վիճակում կհայտնվեինք։ Մենք նրանց հետ ամեն ինչում համագործակցում ենք։ Նրանց մեղադրելով ոչնչի չենք հասնի։ Խաղաղապահները պետք է տասնամյակներով մնան այստեղ, և իմ կարծիքով դա միակ ճանապարհն է»։

Պատասխանելով «kommersant.ru»-ի հարցին պարոն Վարդանյանն ասել է, որ Ստեփանակերտը պատրաստ է Բաքվի հետ բանակցությունների, բայց դրանք պետք է վերաբերվեն քաղաքական, այլ ոչ թե տեխնիկական հարցերին։ «Որպեսզի երկխոսություն լինի, այն պետք է բխի այն հիմքից, որի վրա մենք հենվում ենք,- ասուլիսի ժամանակ ասել է պարոն Վարդանյանը,- ասացինք պատրաստ ենք երկխոսության, բայց ոչ քայլ առ քայլ հանձնվելու ռեժիմով, պատրաստ ենք երկխոսության, որը տեղի է ունենում երկու հարևանների միջև։ Ցավոք, Ադրբեջանը հրաժարվում է, և բոլոր խոսակցություններն այն մասին, որ ինչ-որ երկխոսություն է եղել հիմնավոր չեն: Այն եղել է տեխնիկական մակարդակի վրա, և խոսք չի եղել լուծելու քաղաքական հարց, որն իրոք բոլորիս առաջ է կանգնած»։

Պարոն Վարդանյանը նման կերպ է արձագանքել  ՀՀ վարչապետ Նիկոլ Փաշինյանի հայտարարությունները մեկնաբանելու խնդրանքին։ Վերջինս ասել էր, որ «Ադրբեջանի և Լեռնային Ղարաբաղի միջև պետք է քաղաքական խոսակցություն սկսվի, և Լեռնային Ղարաբաղի մեր գործընկերները չպետք է թույլ տան որևէ մեկին մեղադրել իրենց կառուցողական խոսակցությունը խաթարելու կամ այդ խոսակցությունն անհնարին դարձնող գործողություններ ձեռնարկելու մեջ»։ Նա նաև հորդորել էր Ստեփանակերտին որպեսզի չլինի նոր ռազմական էսկալացիա «խուսափել քաղաքական հայտարարություններից, որոնք էլ ավելի են փակուղային դարձնում իրավիճակը»։

 «Մտահոգիչ են Հայաստանի վարչապետի մի շարք հայտարարություններ և կարծիքներ, քանի որ դրանք չեն համապատասխանում  ազգային պայքարի գաղափարներին, ինչպես նաև Արցախի Հանրապետության ժողովրդի և իշխանությունների դիրքորոշումներին: Արցախի Հանրապետության ժողովուրդը և իշխանությունները վստահ են, որ ողջ աշխարհի հայությունը կշարունակի աջակցել Արցախի իրենց եղբայրների և քույրերի կողմից ընդունված որոշումը և կոչ ենք անում Հայաստանի Հանրապետության իշխանություններին օգտագործելով միջազգայնորեն ճանաչված պետության բոլոր հնարավորություններն ու բոլոր գործիքները առաջնորդվել բացառապես միջազգային ատյաններում Արցախի ինքնորոշման իրավունքներն առաջ տանելու և պաշտպանելու դիրքորոշմամբ: Մեր դիրքորոշումը բավականին կոշտ դիրքորոշում է, և այն տարբերվում է Հայաստանի ղեկավարության դիրքորոշումից»,- ամփոփել է պարոն Վարդանյանը։

Չճանաչված հանրապետության կառավարության ղեկավարը փաստացի խուսափել է պատասխանել «kommersant.ru»-ի լրացուցիչ հարցին, թե ինչի՞ հետ են կապված Ստեփանակերտում տեղի ունեցած կադրային վերադասավորումները Լաչինի միջանցքի ճգնաժամի ֆոնին։ Այս ընթացքում պաշտոնանկ է արվել Անվտանգության խորհրդի ղեկավար Վիտալի Բալասանյանը, ով վարժ տիրապետում է ադրբեջաներենին և մասնակցել է Բաքվի հետ ոչ հրապարակային շփումներին, փոխվել է նաև արտգործնախարարը։

«Դա նախագահի որոշումն է։ Շրջափակման տակ գտնվելով թիմ ստեղծելը պահանջում է արտառոց քայլեր, որոնք միավորում են բոլորին մեկ միասնական թիմի մեջ»,- ասել է նա։

Նյութը հրապարակման պատրաստեց Կամո Խաչիկյանը