Արցախում ներքաղաքական իրավիճակը երեկվա համեմատ էականորեն լիցքաթափվել է

Արցախում ներքաղաքական իրավիճակը երեկվա համեմատ էականորեն լիցքաթափվել է։

«Պատիվ ունեմ» խմբակցության քարտուղար, Արցախի նախագահի անվտանգության հարցերով նախկին խորհրդական Տիգրան Աբրահամյանի գնահատմամբ՝ Արցախում ապրող մեր հայրենակիցները լուրջ խնդիրներ ունեն և ողջ ռեսուրսն ու պոտենցիալը պետք է համախմբել և ուղղել դրա սպասարկմանը։ «Հույս ունեմ, որ, հատկապես, Արցախի շուրջ ստեղծված ծանր իրադրության պայմաններում սթափությունն ու ադեկվատությունը, ողջամտությունը, տրամաբանությունը, իմաստությունը չեն լքի հիմնական դերակատարներին և Արցախի համար հավելյալ սպառնալիքներ չեն ստեղծի»,- ֆեյսբուքյան իր էջում գրել է պատգամավորը։

Պետնախարար Ռուբեն Վարդանյանի շուրջ ստեղծված իրավիճակի լակմուսի թուղթ էր հայ հասարակության համար հասկանալու, թե ով է շահագրգիռ Արցախում իրավիճակի լիցքաթափման, մեր հայրենակիցների կյանքի իրական բարելավման հարցում, և ով է պարզապես սպասարկում փաշինյանական վարչախմբի կեղտոտ նպատակները։ Մի շարք քաղաքական ուժեր և գործիչներ, որոնք նախկինում քննադատում էին Ռուբեն Վարդանյանին վերջին օրերին իրենց բավական դրական և ողջամիտ են դրսևորել՝ հայտնելով, որ նույնիսկ եթե դեմ են արտահայտվում Ռուբեն Վարդանյանի գործունեությանը կամ անհասկանալի են համարում այն, իրականում նրա պաշտոնանկությունն այսօր լրջագույն վտանգ է ներկայացնում հայկական երկրորդ պետության, նաև Հայաստանի Հանրապետության համար։

Շատերի համար՝ հատկապես Նիկոլ Փաշինյանին սպասարկող «արևմտամետների» համար, Վարդանյանի շուրջ ստեղծված իրավիճակն առիթ էր սեփական մաղձը թափելու, ինչպես նաև Արցախի պետնախարարին հնարավոր բոլոր մեղքերի մեջ մեղադրելու հարցում։

Ըստ էության, ինչպիսի հանգուցալուծում էլ ունենա ներքաղաքական իրավիճակն Արցախում, վերջին օրերի զարգացումները՝ քաղաքական գործիչների և նրանց սպասարկող ԶԼՄ-ների արձագանքները, պետք է մանրամասն հետաքննվեն և հետազոտվեն հանրության կողմից՝ հասկանալու վերջապես, թե ով է իրականում սպասարկում հայ ժողովրդի շահերը և ով՝ ընդամենը գործող վարչախմբի շահերը։

Փաշինյանական իշխանությունը մեկ հարցում դրական «քայլ» կատարեց, բացահայտեց բոլորի դեմքը։

Ազատ Ազատյան