Արցախի պետնախարարի ուշագրավ ակնարկը ֆրանսիական ալիքին

Արցախի պետնախարար Ռուբեն Վարդանյանը շարունակում է արևմտյան մամուլի հետ բավական ակտիվ շփումները, կարողանում Արցախի և արցախցիների ձայնը տեղ հասցնել արևմտյան երկրներին։

Նախօրեին նա հարցազրույց է տվել ֆրանսիական հեղինակավոր «Ֆրանս 24» հեռուստաընկերությանը՝ ներկայացնելով իրավիճակն Արցախում, նաև մանրամասն և փաստերով ներկայացրել Եվրոպայի անելիքները այս առումով։

Ըստ պետնախարարի՝ եվրոպացիները պետք է ճնշում գործադրեին և ասեին, որ անընդունելի է Լաչինի միջանցքի շրջափակումը, նաև չպետք է Ալիևին հրավիրեին Դավոս ՝ ցույց տալով, որ նա արևմտյան քաղաքակրթության մաս չի կարող կազմել։

Եվրոպացիները կարող են օդային միջանցք ստեղծել, որպեսզի մարդասիրական ինքնաթիռները կարողանան Ստեփանակերտում վայրէջք կատարել և բերել մեզ այդքան անհրաժեշտ պարեն ու դեղորայք, նաև կարծում եմ, որ այս պատմությունն ավարտելու լավագույն ձևերից մեկը կլինի Արցախը որպես անկախ պետություն ճանաչելը, որովհետև Ադրբեջանը չի կարողանում նորմալ կյանքի պայմաններ ապահովել ոչ միայն հայերի, այլ նույնիսկ իր ժողովրդի համար։

Ներկայիս իրավիճակը ևս մեկ անգամ ապացուցում է, որ հնարավոր չէ ապրել Ադրբեջանի կազմում, որտեղ այդքան ճնշում և այդքան հարձակումներ են լինում քաղաքացիական բնակչության նկատմամբ,- նշել է պետնախարարը։

Չնայած բոլոր դժվարություններին՝ Ռուբեն Վարդանյանը նշում է, թե «մարդիկ ամուր են և դիմանում են, նրանք ասում են քանի որ պայքարում են իրենց անկախության համար, պատրաստ են մնալ և ցույց տալ խիզախությունը և տուրք չտալ ճնշումներին։ Ժողովուրդը հասկանում է իրավիճակը և ընդունում է, որ դժվար ժամանակաշրջան է»,- ասել է նա։

«Ո՞ւմ ձեռքում է լուծման և Լեռնային Ղարաբաղի ժողովրդի տառապանքների վերջ դնելու բանալին», հարցին էլ պետնախարարն ընդգծել է, որ այս ամենի հիմնական շահառուն Ալիևի ռեժիմն է, որովհետև արտաքին թշնամի ունենալն է թույլ տալիս պահել իր իշխանությունը։

«Չմոռանանք, որ տասնամյակներ շարունակ այդ երկիրը ղեկավարում է մեկ ընտանիք, ուստի երկրի ներսում միասնական պահելու համար միակ միջոցը արտաքին թշնամի ունենալն է, ում միշտ կարելի է օգտագործել սեփական ժողովրդին կոնսոլիդացնելու համար»,- ասել է Ռուբեն Վարդանյանը և նշել, թե մի օր Ադրբեջանը պետք է հասկանա, որ կողք կողքի ապրելու միակ ձևը հարևաններ լինելն է և ոչ թե Ադրբեջանի մաս կազմելը։

Պետնախարարը նաև ամոթանք է տվել Եվրոպային, որ շարունակում է Ադրբեջանի հետ առևտրային գործունեությունը՝ ընդունելով ավտորիտար ռեժիմը, որը փորձում է քանդել Արցախի պես ժողովրդավարական երկիրը։ Պետնախարարը դա համարել է մեծ խաղացողներից շատերի երկակի ստանդարտների օրինակ։

Քնարիկ Նավասարդյան