Փաշինյանը չի հրաժարվում Ռուբեն Վարդանյանին Արցախից հեռացնելու գաղափարից

Նիկոլ Փաշինյանը որևէ կերպ չի հրաժարվում Ռուբեն Վարդանյանին Արցախից հեռացնելու գաղափարից։ Ընդ որում, նա դա անում է ոչ այնքան սեփական իշխանությունը պահելու, որքան Թուրքիայի և Ադրբեջանի նախագահներ Ռեջեփ Թայիփ Էրդողանին ու Իլհամ Ալիևին սիրաշահելու համար։

Ռուբեն Վարդանյանը նախօրեին վերադարձել է Արցախ, հայտնի չէ թե ինչպես և ինչ ճանապարհով։ Արցախի կառավարությունից այդպես էլ ո՛չ հերքել, ո՛չ էլ հաստատել էին նրա Մոսկվա մեկնելու և հանդիպումներ ունենալու հանգամանքը։ Վարդանյանն արդեն ամբողջ թափով անցել է իր աշխատանքին և արդեն իսկ բավականին շոշափելի արդյունքներ գրանցել։

Ուստի և փաշինյանական վարչախումբը նորանոր սպեկուլացիաներ է մտմտում Ռուբեն Վարդանյանի դեմ, հայտարարում են, թե հենց նրա պատճառով է, որ Ադրբեջանը համառորեն չի բացում Լաչինի ճանապարհը, մինչդեռ բոլորի համար էլ պարզ է, որ սա ընդամենը հերթական «բլեֆն» է փաշինյանական վարչախմբի կողմից։

Անգամ, եթե ադրբեջանցիները Ռուբեն Վարդանյանին պաշտոնազրկելու պարագայում հանեն Լաչինի միջանցքի շրջափակումը, չի բացառվում, որ ընդամենը մեկ-երկու օր անց կրկին շրջափակեն՝ այժմ էլ այլ պատրվակ գտնելով։ Ռուբեն Վարդանյանին հանելու պարտադրանքը չի կարողանում կատարել նաև Արցախի նախագահ Արայիկ Հարությունյանը։

Հաշվի առնելով ներարցախյան տրամադրությունները, ինչպես նաև Արցախում՝ օրեցօր Ռուբեն Վարդանյանի աճող հեղինակությունը, Արցախի նախագահը պարզ և հստակ Նիկոլ Փաշինյանին ասել է, թե չի կարող հանել պետնախարարին, ուստի և սահմանադրական փոփոխությունների գործընթաց են նախաձեռնում՝ սեփական կաշին փրկելու համար։

Ռուբեն Վարդանյանի ֆակտորը չեզոքացնելու, ինչպես նաև թուրք-ադրբեջանական տանդեմին գոհացնելու համար Փաշինյանն Արցախ է ուղարկել պաշտպանության բանակի նախկին հրամանատար Սամվել Բաբայանին, որպեսզի նախ նա ոչ միայն դուխ տա Արցախի գործող իշխանություններին, համոզի հրաժարվել պետնախարարի ծառայություներից, այլ նաև սեփական ռեսուրսներն օգտագործելով Արցախում պետնախարարի դեմ նոր խմորումներ կազմակերպի, ինչպես նաև իր ներկայությամբ պարտադրի իշխանություններին պետնախարարից հրաժարվելու համար։

Իրավիճակն այս պահին Արցախում սառեցված է և ամենևին էլ ծայրաստիճան սրված չէ, ինչպես փորձում են ներկայացնել Հայաստանի գործող իշխանություններն ու նրանց կամակատարները, մինչդեռ Փաշինյանն ամեն գնով փորձում է պարտադրել պետնախարարի հրաժարականը, թեև ինքն էլ գիտակցում է, որ դա լուրջ հետևանքներ է ունենալու։

Աննա Նադոյան