Բազմաքայլ կոմբինացիա՝ Ռուբեն Վարդանյանից ազատվելու ակնկալիքով

Արցախի նախագահ Արայիկ Հարությունյանը պետնախարար Ռուբեն Վարդանյանին պաշտոնանկ անելու ավելի խելացի տարբերակ չի գտել, քան սահմանադրական փոփոխություններ նախաձեռնելը։ Եվ այդ կապակցությամբ, թե՛ Հարությունյանի շրջապատը, թե՛ փաշինյանական վարչախմբի անմիջական ազդեցության տակ գտնվող գործիչներն աղմկում-աղաղակում են, իբր Արցախում սահմանադրական ճգնաժամ կա և հարկավոր է լուծել այդ հարցը։

Արցախում սահմանադրական փոփոխություններ նախաձեռնելու որոշումը Հարությունյանը կայացրեց Մոսկվայից վերադառնալուց անմիջապես հետո, ընդ որում, միայն մեկ կետի շուրջ։ Առաջարկվում է նախագահի հրաժարականի, մահվան կամ անկանխատեսելի ֆորս-մաժորային իրավիճակի դեպքում Ազգային ժողովին լիազորել նախագահ ընտրել, իբր այդկերպ հնարավոր կլինի խուսափել ճգնաժամային իրավիճակներից։

Իրականում, այդ փոփոխությունների մոտիվը միայն մեկն է։ Արցախի գործող նախագահը լրջագույն ճնշման տակ է թե՛ Նիկոլ Փաշինյանի կողմից, թե՛ Ադրբեջանի, որոնք միահամուռ կերպով պահանջում են Ստեփանակերտից հեռացնել պետնախարարին և ավելի ենթարկվող ու անսկզբունքային անձի նշանակել պետնախարարի պաշտոնում։

Տեղեկություններ կան, որ Ռուբեն Վարդանյանի հրաժարականն է պահանջում նաև Թուրքիայի նախագահ Էրդողանը, ով անձամբ Պուտինին է դիմել նրա հարցով։ Սակայն, խնդիրն այն է, որ Վարդանյանը զուտ ռուսական կրեատուրա չէ, նա կոնսենսուսային ֆիգուր է թե՛ ՌԴ, թե՛ Արեմուտքի համար, որոնք էլ ոչ բացահայտ, սակայն պաշտպանում են պետնախարարին։

Արցախի գործող նախագահը գիտակցում է, որ հենց այնպես չի կարողանալու պաշտոնանկ անել պետնախարարին, ով կարճ ժամանակում մեծ հանրային աջակցություն է ստացել Արցախում, նաև արցախյան լուրջ շրջանակներ են աջակցում Վարդանյանին։ Ուստի, փոփոխություններ նախաձեռնելով՝ Արայիկ Հարությունյանը մտադիր է ինքն էլ հրաժարական տալ, խուսափել իր քայլերի պատասխանատվությունից և հեռանալ։ Թերևս, դեռ իրադարձությունները գնում են այս սցենարով։

Սերինե Բադալյան