Ռուբեն Վարդանյանը՝ իր պաշտոնանկման և Արցախի ներքաղաքական իրավիճակի մասին

Արցախի պետական համակարգը ունի բավարար կադրեր աշխատելու համար, պատրաստ է վերափոխվել և պատրաստ է աշխատել ստեղծված նոր պայմաններում։

Արձանագրումը, արդեն նախկին պետնախարար Ռուբեն Վարդանյանինն է, որը հարցազրույց է տվել Արցախի հանրային հեռուստաընկերությանը։ Վարդանյանը առաջին անգամ մեկնաբանել է իր պաշտոնանկությունը, նշել, որ դա չափազանց սխալ որոշում էր Արցախի իշխանությունների կողմից։ Մասնավորապես, 110 օրից ավելի պաշտոնավարող նախկին պետնախարարը հատկապես ընդգծել է, որ իր պաշտոնավարման օրոք առնվազն Արցախի մասին միջազգային արձագանքները կտրուկ և շեշտակի ավելացել են, 40 հազարից ավելի մամուլի հրապարակում է եղել, ընդ որում ոչ միայն հայկական և ռուսական մամուլում, այդ թվում նաև միջազգային մամուլի առաջատար կենտրոններում։

Խոսելով Արցախի ներքաղաքական իրավիճակի մասին՝ Վարդանյանը հատկապես ընդգծել է, որ շատերը կարող են ուրախ լինել իր պաշտոնանկությունից, քանի որ նշանակվելով պաշտոնին, նա և իր թիմը փակել են շատերի «թթվածինը», թույլ չեն տվել յուրացնել պետական միջոցները, ստիպել են աշխատել ավելի արդյունավետ և ավելի կազմակերպված, ինչպես նաև կանխել են բազմաթիվ բացասական երևույթներ։

Ամենակարևոր տարբերությունները իր և գործող նախագահ Արայիկ Հարությունյանի միջև, ըստ Ռուբեն Վարդանյանի, պատկերացումների տարբերությունն էր։ «Համոզված եմ, որ Արցախի ղեկավարության մեջ չկան մարդիկ, ովքեր կցանկանային հանձնել Արցախը, բայց և խորապես համոզված եմ, որ ցավոք սրտի Արցախի ղեկավարությունը չի հասկանում՝ ինչ է նշանակում պայքարել, չկա 24 ժամ, շաբաթը 7 օր պայքարելու պատրաստակամություն, չկա պատասխանատվություն ստանձնելու և շատ դժվար որոշումներ կայացնելու պատրաստակամություն»,- ասել է Ռուբեն Վարդանյանը։

Թերևս հենց այս հանգամանքն է ամենակարևոր և առանցքայինը այն տարբերությունների, որ դավանում է Արցախի գործող իշխանությունը՝ ի տարբերություն շատ կարճ ժամանակաշրջանում բավականին լուրջ արդյունքներ ցուցաբերած պետնախարարի և իր թիմի։

Աշխարհահայացքային և հայեցակարգային այս տարբերություններն են, որ իսկապես նժարին են դնում Արցախի ապագան։ Ընդգծելով, որ չափազանց սխալ էր իրեն պաշտոնից հեռացնելը, Վարդանյանը նաև չափազանց կոռեկտ է արտահայտվում Արայիկ Հարությունյանի մասին, թերևս հաշվի առնելով նախկին գործընկերային և ընկերական հարաբերությունները, սակայն ի վերջո Արցախի և Հայաստանի քաղաքացիները պետք է որոշեն, թե որ հայեցակարգով և որ տեսլականով են պատկերացնում Արցախի զարգացումը։

Սոնա Գասպարյան