Շահգելդյանն առաջարկում է առավել բարձրացնել սահմանին կանգնած զինվորների պաշտպանվածության մակարդակը
Ուշադրության կենտրոնում
Սահմանային անվտանգության և պաշտպանության, ինչպես նաև սահմանամերձ գոտիների զարգացման խնդիրները շարունակելու են մշտապես մնալ բոլորիս ուշադրության կենտրոնում: Ազգային ժողովում հայտարարությունների ժամին այս մասին ասաց ԱԺ ՕԵԿ խմբակցության քարտուղար Մհեր Շահգելդյանը: «Ցավոք սրտի, 2015թ. Ադրբեջանի զինուժի հարձակումների, ռմբակոծությունների և դիպուկահարների կրակոցների արդյունքում ունեցանք բազմաթիվ զոհեր ու վիրավորներ: Միաժամանակ, փաստ է այն, որ մարտական շփման գծում գտնվող մեր երիտասարդ զինվորները բազմիցս ապացուցեցին իրենց մարտական ոգու և խիզախության գերազանցությունը ադրբեջանցի զինվորականների, այդ թվում՝ վարձկանների նկատմամբ, որոնք սպառազինություն գնելու համար ունեն մի քանի անգամ ավել բյուջե»,- «Արմենպրես»-ի հաղորդմամբ՝ ընդգծեց Շահգելդյանը:
Շահգելդյանի համոզմամբ՝ եկել է ժամանակը կտրուկ բարձրացնել սահմանին կանգնած զինվորների պաշտպանվածության մակարդակը: «Հարկավոր է առավել մեծ չափով և հնարավորինս շուտ տեղադրել մշտադիտարկման և արձագանքման սարքեր: Ավելի պարզ ասած՝ մարդկանց առավելագույնս փոխարինել ռոբոտներով՝ մի կողմից բարձրացնելով զինված ուժերի տեխնոլոգիական հագեցվածությունը, մյուս կողմից պաշտպանելով մեր երիտասարդներին զոհվելուց և վիրավորվելուց»,- հավելեց պատգամավորը:
Նրա խոսքով՝ ներկայումս սպառազինությունների համաշխարհային շուկան այսպիսի լայն ընտրանի է առաջարկում և տեխնոլոգիական զարգացման ընթացքում գները իջնում են: «Մեկ այլ տեսանկյունից՝ ՀԱՊԿ անդամակցության շրջանակներում, ես համոզված եմ, որ մենք կկարողանանք ձեռք բերել բազմաթիվ սարքավորումներ շատ ավելի էժան գներով դաշնակցային հարաբերությունների արդյունքում»,- ասաց պատգամավորը:
Շահգելդյանը հավելեց, որ նավթի գների անկումը խուճապային վիճակ է ստեղծել Ադրբեջանում, ուստի Ադրբեջանում ստեղծվել է մի իրավիճակ, երբ իշխանությունները ստիպված են առավել շատ ուշադրություն դարձնել երկրի ներքին խնդիրներին: Նրա խոսքով՝ այս ժամանակահատվածը հարկավոր է օգտագործել հայ զինծառայողների պաշտպանվածության մակարդակի բարձրացման համար:
1
2
3
4
5
1
2
3
5
1
2
3
4
5
