Կեղտոտ խաղեր՝ Ռուբեն Վարդանյանի կադրերի թիկունքում

Արցախում Ռուբեն Վարդանյանի թիմում պաշտոնի նշանակված հերթական նախարարն է ազատվել իր աշխատանքից։

Առողջապահության նախարար Սամվել Ավետիսյանը դիմում է ներկայացրել զբաղեցրած պաշտոնից հրաժարվելու վերաբերյալ։ Հիշեցնենք՝ օրեր առաջ էլ երեք այլ նախարարներ էին ազատվել նախագահ Արայիկ Հարությունյանի հրամանագրով, ինչից հետո մեր լրատվամիջոցը, վկայակոչելով իր աղբյուրները, նշեց, որ գործող Արցախի իշխանություններն ամեն ինչ անում են Ռուբեն Վարդանյանի բերած պրոֆեսիոնալ կադրերից ազատվելու և Արցախի բյուջեի վատնումները՝ տարիներ շարունակ ձևավորված արատավոր ավանդույթի համաձայն, շարունակելու նպատակով։

Սամվել Ավետիսյանը ուղերձ է հրապարակել, որտեղ նշել է, թե ամենևին էլ կառչած չլինելով առողջապահության նախարարի աթոռից, ցանկանում է տեղեկացնել, որ պաշտոնից հրաժարվելու անմիջական և միակ պատճառն այն է, որ իր պաշտոնավարման ընթացքում առանց տեղեկացնելու, այսինքն իր մեջքի ետևում, առողջապահական համակարգի ղեկավարի պաշտոնը ստանձնելու առաջարկ է արվում մեկ ուրիշին։ Դրանով իսկ տպավորություն են ստեղծում, որ գործընթացը գաղտնի է, մինչդեռ, եթե չեն ցանկանում աշխատել քեզ հետ, ապա քեզ պետք է ասվի ուղիղ, առանց այլևայլությունների՝ հարգելով դիմացինին: Հավելել է նաև, թե ով սովոր է կեղծ լինելու ուրիշների հետ, նա ի վերջո դադարում է անկեղծ լինել ինքն իր հետ։

Սամվել Ավետիսյանը Արցախի առողջապահության նախարարի պաշտոնում նշանակվել էր 2022 թվականի դեկտեմբերի 21-ին, մինչ այդ նա Բժշկական համալսարանի պրոռեկտորն էր և Հայաստանում հարգված և մեծ վաստակ ունեցող բժիշկ էր։

Առողջապահության նախարարի պաշտոնից Միքայել Հայրյանին ազատելուց և նրա փոխարեն պրոֆեսիոնալ բժշկի նշանակելուց հետո, Արայիկ Հարությունյանի նախկին թիմակիցը իսկական արշավ էր սկսել թե՛ Ռուբեն Վարդանյանի և թե՛ նրա նշանակած կադրերի դեմ և, մեր աղբյուրների փոխանցմամբ, հենց վերջինիս էլ կրկին ցանկանում են վերադարձնել այդ պաշտոնին։ Ռուբեն Վարդանյանի պետնախարար նշանակվելուց հետո, նախարար նշանակված անձանցից հինգը դեռևս պաշտոնավարում են։

Հիշեցնենք՝ Արայիկ Հարությունյանը Ռուբեն Վարդանյանի նշանակումից հետո նրան էր փոխանցել գրեթե բոլոր նախարարությունները, բացառությամբ՝ ուժայինների և այժմ, ըստ մեր աղբյուրի, Հարությունյանը մտադիր է ազատվել նաև պաշտոնավարող հինգ նախարարներից առնվազն չորսից։ Ռուբեն Վարդանյանի հետ եկած բոլոր պրոֆեսիոնալ կադրերը Արցախի գործող իշխանությունների թիրախի տակ են։

Լուիզա Գասպարյան