Արամ Սուջյանը՝ «Ռեինկարնացիայի» հետ կոնֆլիկտների և նոր նախագծի մասին

«Այժմ աշխատում եմ նոր երգչուհու հետ, հանձն եմ առել «Հայաստանի ձայն» նախագծից հայտնի հեղինակ-կատարող Աննա Պապյանի պրոդյուսերի գործառույթը: Առաջին տեսահոլովակը կներկայացնենք արդեն իսկ փետրվարի 14-ին՝ Սուրբ Վալենտինի օրը: Ճիշտ է, երգը սիրո մասին է, սակայն տեսահոլովակում վերացական է ներկայացված»,-Aysor.am-ին տեղեկացրեց Ա. Սուջյանը: 

Երգը կոչվում է «Լա լեյ»: Երաժշտությունը գրել է Աննա Պապյանը, խոսքերը՝ Դօրիանը: Տեսահոլովակի ռեժիսորն է Կարեն Քոչարյանը, թեև սյուժետային մտահղացումները պատկանել են պրոդյուսերին և երգչուհուն:

Արամ Սուջյանը չի սահմանափակվում միայն այս աշխատանքով, շուտով նա կներկայանա ևս մեկ նախագծով, սակայն այս անգամ փակագծերը բացել հրաժարվեց:

Առիթն օգտագործելով՝ հետաքրքրվեցինք նաև, թե ինչո՞վ էր պայմանավորված, որ «Ռեինկարնացիա» խմբի հետ, տևական ճանապարհ անցնելով և նկատելի ձեռքբերումներ ունենալով հանդերձ, դադարեց աշխատել, և արդյոք ճիշտ են շշուկները, թե խմբի տղաների և պրոդյուսերի միջև տարաձայնություններ էին առաջացել:

«Մինչ «Ռեինկարնացիան»՝ ես միշտ էլ աշխատել եմ տարբեր ոճերի արտիստների հետ: Պարզապես իմ պրակտիկայում այդ խմբի հետ համագործակցելն ամենատևականն էր՝ 8 տարի: Որոշեցի այլ երգիչ-երգչուհիների, խմբերի հետ աշխատել, փորձել օգնել, որպեսզի նրանք ևս առավել մեծ հաջողությունների հասնեն: Ովքեր ինձ գիտեն, կհաստատեն, որ ես միշտ փնտրում ու գտնում եմ տաղանդավոր մարդկանց ու փորձում այնպես անել, որ հասնեն իրենց ուզածին, իսկ թե ինչ է իրենց ուզածը, դա արդեն հարցի մեկ այլ կողմն է… Այնպես որ, կոնֆլիկտային իրավիճակներ չկան, ամեն ինչ հանդարտ է»,-ժպիտով եզրափակեց պրոդյուսերը:

Նյութը՝ սկզբնաղբյուր կայքում