Ռուբեն Վարդանյանի պաշտոնանկությունը Արցախի և Հայաստանի ձախողումն էր

Արցախի շուրջ ստեղծված ծայրահեղ ծանր իրավիճակը և պետնախարար Ռուբեն Վարդանյանին պաշտոնանկ անելուց հետո ոչ թե Լաչինի միջանցքի բացումը, այլ ընդհանրապես գրունտային ճանապարհի լիակատար փակումը Ադրբեջանի կողմից, հերթական անգամ վկայեցին պետնախարարի պաշտոնից Ռուբեն Վարդանյանին ազատելու հանգամանքի լիակատար ձախողումը։

Տևական ժամանակ, գրեթե 3 ամիս, հայաստանյան և արցախյան որոշ շրջանակներ փորձում էին համոզել, թե Վարդանյանի ազատումը թույլ կտա պայմանավորվել ադրբեջանցիների հետ և բացել կյանքի ճանապարհը։

Թերևս, այլևս արդեն իսկ կարող ենք արձանագրել, որ ոչ թե ճանապարհը բացվեց, այլ Ադրբեջանն անցավ Արցախի լիակատար շրջափակումն իրականացնելուն։ Թե՛ Վարդանյանն ինքը, և թե՛ Հայաստանի ու Արցախի քաղաքագիտական շրջանակները, հանրությունը, փորձում էին փաշինյանական իշխանությանն ու նրա արցախյան խամաճիկ՝ Արայիկ Հարությունյանին բացատրել իրենց քայլի անհեռանկարայնությունը և վտանգավորությունը։

Այդ հանգամանքը, սակայն, բնավ էլ չխանգարեց, որպեսզի Ադրբեջանի պահանջով պարզապես առանց զգուշացնելու հեռացնեն Ռուբեն Վարդանյանին։ Ինքը՝ Վարդանյանն էլ, իր ազատումից մեկ օր անց սխալ էր գնահատել այդ ազատումը, նշել, որ անձամբ պատրաստ է մնալ Արցախում և շարունակել հանուն Արցախի շարքային զինվորի պես պայքարելը, սակայն որևէ կերպ հնարավոր չի լինելու ինչ-որ համաձայնության հանգել Ադրբեջանի հետ։

Օրեր առաջ Ադրբեջանն ընդհանրապես փակել է գրունտային գաղտնի ճանապարհը, դիրքավորվել ռազմավարական նշանակություն ունեցող կարևորագույն մի բարձունքի վրա և գրեթե ամենօրյա ռեժիմով կրակոցներ է արձակում Արցախի տարբեր գյուղերի, բնակիչների ուղղությամբ, որոնք պարզապես գյուղատնտեսական աշխատանքներ են իրականացնում։ Ադրբեջանն այժմ ամեն ինչ անելու է Արցախը հայաթափելու համար, իսկ նրա հիմնական խոչընդոտներից մեկը հենց պետնախարարի պաշտոնում Ռուբեն Վարդանյանն էր և նրա կազմակերպված և կշռադատված աշխտանքը, ինչպես նաև միջազգային լրատվամիջոցների հետ Վարդանյանի չափազանց արդյունավետ համագործակցությունը, երբ կարճ ժամանակահատվածում Արցախի մասին ավելի շատ տեղեկություններ հայտնվեցին միջազգային մամուլի էջերում, քան նույնիսկ պատերազմական իրավիճակներում էր։

Հերթական անգամ արձանագրենք, որ պետնախարարի պաշտոնից Ռուբեն Վարդանյանի ազատումը ընդամենը Ալիևի քմահաճույքն էր և այդ քմահաճույքին Նիկոլ Փաշինյանի ու Արայիկ Հարությունյանի անտրտունջ հնազանդվելը։ 

Սոնա Գալստյան