ԶՊՄԿ-ում արդեն իսկ արվել են տասնյակ միլիոն դոլարի ներդրումներ. Վարդան Ջհանյան

Զանգեզուրի պղնձամոլիբդենայինի հիմնադրման 70-ամյակի առիթով մեր հրապարակումներում քանիցս անդրադարձ է կատարվել ընկերությունը ղեկավարող թիմին:

Լեռնագործների հետ շփումներում բազմիցս գնահատանքի խոսքեր ենք լսել ընկերության կառավարումն իրականացնող պաշտոնյաների մասին:

Միևնույն ժամանակ առնչվել ենք հարցերի, որոնց պատասխաններն ընկերության ղեկավարների գործառույթների տիրույթում են: Այդ իսկ պատճառով կարևորել ենք նրանց հետ հանդիպումներն ու զրույցները:

Մեր զրուցակիցն է «Զանգեզուրի ՊՄԿ» ՓԲ ընկերության գլխավոր տնօրենի 1-ին տեղակալ Վարդան Ջհանյանը:

Վարդան Ջհանյանը 2016 թվականից  սերտիֆիկացված ֆինանսական վերլուծաբան է, իսկ 2014 թվականից Սերտիֆիկացված հաշվապահների ասոցիացիայի անդամ:

Ունի ֆինանսական կառավարման և ֆինանսական աուդիտի 15 տարվա փորձ և վեց տարվա փորձ՝ հանքարդյունաբերության ոլորտում՝ բարձրագույն ղեկավար պաշտոններում:

Մինչև ԶՊՄԿ գլխավոր տնօրենի առաջին տեղակալ նշանակվելը (հոկտեմբեր 2021թ․) Ագարակի պղնձամոլիբդենային կոմբինատի ֆինանսական տնօրենն էր՝ 2017 թվականից:

Դրանից առաջ տարբեր պաշտոններում աշխատել է Deloitte-ի ԱՊՀ ստորաբաժանման հետ (2010-2017 թթ.):

Վարդան Ջհանյանը հաշվապահության, վերլուծության և աուդիտի մագիստրոսի կոչում է ստացել Մոսկվայի ազգային հետազոտական միջուկային համալսարանում (MEPHI)՝ 2009 թվականին։

- Որքան հիշում ենք, ընկերության նոր սեփականատերը և նոր գործադիր թիմն անդրադարձներ են կատարել ընկերությունում իրականացվելիք ներդրումային ծրագրերի վերաբերյալ: Կարո՞ղ ենք իմանալ՝ ներդրումային ի՞նչ կոնկրետ ծրագրեր կան և անցած մեկ տարվա ընթացքում որքանո՞վ են դրանք կյանքի կոչվել:

- ԶՊՄԿ-ում արդեն իսկ արվել են տասնյակ միլիոն դոլարի ներդրումներ՝ տեխնիկական վերազինման, բնապահպանական համակարգերի արդիականացման համար։ Ամբողջությամբ թարմացվում է հանքաքար տեղափոխող ինքնաթափերի պարկը։ Ինչ վերաբերում է ԶՊՄԿ-ից դուրս խոշոր ներդրումային ծրագրերին, ապա դա «Գեոպրոմայնինգ» ընկերությունների խմբի ղեկավարության տիրույթում գտնվող հարց է, և կարծում եմ՝ ճիշտ կլիներ, որ դրան, առիթի դեպքում, խմբի ղեկավարությունը պատասխաներ։

- Եվ, իհարկե, ընկերության դերակատարությունը մեր պետական բյուջեի համալրման գործում: Հարցազրույցներից մեկում Դուք նշել եք երկրի պաշտպանունակության ամրապնդման գործում ԶՊՄԿ-ի դերակատարության մասին: Եվ նույնիսկ օրինակ եք բերել՝ 2021-ին պետբյուջեից պաշտպանությանն ուղղված ծախսերը եղել են 319 մլրդ դրամ, որի կեսից ավելին ապահովել է ԶՊՄԿ-ն: Ենթադրում ենք, որ Զանգեզուրի պղնձամոլիբդենայինը շարունակում է առաջնահերթ համարել երկրի և, իհարկե, Սյունիքի պաշտպանունակության ամրապնդումը:

-  Նախ դիտարկենք այն գործոնները, որոնք հնարավոր են դարձրել այդ ավելացումը՝ ԶՊՄԿ-ի հարկերի առումով։ Առաջինը՝ պղնձի, մոլիբդենի գների բարձրացումն է, ինչը սկսվել է նախանցյալ տարի և շարունակվել 2022-ի առաջին կիսամյակում: Երկրորդը՝ «Հարկային օրենսգրքում» պետական տուրքեր կոնցենտրատների արտահանման համար՝ սահմանված լրացուցիչ ռոյալթին էր, ինչը նույնպես նպաստել էր  աճի դինամիկային։ Այդ դրույթը երկարաժամկետ առումով խնդիրներ էր ստեղծում ոլորտի համար, և լավ է, որ փոփոխվեց։ Կարճաժամկետ կտրվածքում դա կնպաստի հարկային մուտքերի որոշակի կրճատմանը, բայց ոլորտի կողմից կայուն տնտեսական ներդրման առումով այդ փոփոխությունն անհրաժեշտ էր։ 

Եվ, անշուշտ, որոշակի վարչարարական բարեփոխումները նույնպես նպաստել են, որ մոտավորապես նույն արդյունահանման պայմաններում հարկային մուտքերը բարելավվեն։

Ինչ վերաբերում է պաշտպանության ոլորտին, ես ընդամենն օրինակ էի բերել, որ մեր վճարած հարկերը համարժեք են պաշտպանությանն ուղղված բյուջեի կեսին, որպեսզի ավելի լավ պատկերացում լինի, թե ինչ ահռելի գումար է։  Միևնույն ժամանակ, սա նաև ցույց է տալիս, թե ինչ կարևոր է եղած ռեսուրսները, այդ թվում՝ հանքարդյունաբերության ոլորտի ռեսուրսները ճիշտ օգտագործելը և զարգացած տնտեսություն ունենալը: Առանց զարգացած տնտեսության մենք չենք կարող ունենալ հզոր բանակ, հզոր պետություն: Ես սա առիթ ունեցել եմ ասելու՝ եթե Հայաստանը ԶՊՄԿ-ի հզորության ևս մեկ կամ երկու ծրագիր ունենար, կունենայինք որակապես այլ տնտեսություն։

Ամբողջական հարցազրույցն ՝ այստեղ: