Ռուբեն Վարդանյանի պնդմամբ՝ մենք կարող ենք ունենալ զարգացած, արժանապատիվ, ուժեղ պետություն

Մենք կարող ենք ունենալ զարգացած, արժանապատիվ, ուժեղ պետություն՝ հասկանալով, որ մեր հարևան պետությունը շարունակելու է իր ռազմավարությունը, որ Արցախը չպիտի լինի անկախ և հայկական։

Արցախի նախկին պետնախարար Ռուբեն Վարդանյանն է այդ մասին ասել ուղիղ եթերում։ Նրա խոսքով, դա դժվար իրավիճակ է։ «Միակ պատասխանը դրան․ լինել ուժեղ։ Պետք է հասկանանք, որ հարևան պետությունը պետք է զգա, որ բոլորը, ովքեր ապրում են Արցախում, պատրաստ են պաշտպանել իրենց հայրենիքը, պատրաստ են մինչև վերջ գնալ, որպեսզի մենք ունենանք մեր անկախությունը, որ ներսում ունենալով տարբեր խնդիրներ, տարբեր հարցեր և հարաբերություններ, պատրաստ են համախմբվել թշնամու դեմ։ Եվ այդ ուժը ցուցաբերելով, հավատացեք, հարևան պետությունը չի կարող անել այն, ինչ մեզ թվում է՝ կարող է, քանի որ ինքն ավելի մեծ է»,- նշել է նախկին պետնախարարը։

Վարդանյանին նաև հարց են տվել տարիներ շարունակ Արցախը թալանողների վերաբերյալ։ «Ես ուզում եմ պատասխանել շատ ծանր հարցի, որ ինձ տվել է երիտասարդ կին։ Նա ասում է, որ իմ շուրջը կան մարդիկ, որոնց հետ ես շփվում եմ, մեղավոր են տարբեր հարթակներում։ Մեղավոր են՝ անցյալում կամ ներկա իշխանության մեջ գտնվելով տարբեր սխալ բաներ անելու համար։ Եվ դրա պատճառով երիտասարդներն ուզում են լքել և գնալ Արցախից։ Ուզում եմ ասել, որ իսկապես մենք ունենք մեծ հիասթափություն, ցածր հավատ՝ իրար նկատմամբ։ Ցավոք, ունենք շատ բամբասանքներ բոլորի մասին։ Բայց իմ մոտեցումը եղել է ուրիշ։ Ես ասել եմ, որ բոլորս պետք է իրար հասկանանք, որ մենք կանգնած ենք անդունդի, հայրենական պատերազմի առջև։ Այս իրավիճակում այն մարդիկ, որոնք պատրաստ են ենթարկվելու պատերազմական օրենքներին, պատրաստ են մեջք-մեջքի կանգնել և պաշտպանել հայրենիքը, պետք է մի կողմ թողնենք, թե ինչ է եղել անցյալում։ Եվ քննիչը, և բանտարկյալը կողք-կողքի կռվելով կարող են պաշտպանել իրենց հայրենիքը»,- նշել է Վարդանյանը։

Նրա խոսքով, հետագայում, երբ կհաղթահարենք մեր դժվարությունները, բանտարկյալը կնստի բանտում և իր պատիժը կկրի, քննիչը կշարունակի իր գործը։ «Ես այդ մոտեցումն ունեմ։ Ես չեմ ուզում ոչ մեկին գնահատական տալ անցյալի համար։ Ես ունեմ իմ ընկերները, իմ ընկերների հետ հարաբերություններ, որը ոչ մի կապ չունի գործի հետ։ Գործում բոլորը հավասար են։ Դա սկզբունքային ամենակարևոր բաներից մեկն է իմ համար։ Եթե մենք որոշել ենք, որ այս ձևով ենք ապրելու, բոլորը դրան պիտի ենթարկվեն։ Եվ կապ չունի՝ հերոս է, հերոս չի, իշխանության մեջ է, թե իշխանության մեջ չի, հարգված մարդ է, թե հարգված մարդ չի։ Բոլորս այդ սկզբունքին պետք է ենթարկվենք»,- ասել է նա։ 

Սոնա Գալստյան