Աննորմալ իրականություն
Ուշադրության կենտրոնումՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Սյունիքի մարզի Տեղ գյուղի բնակիչները, ըստ «Հայաստան» խմբակցության պատգամավոր Գառնիկ Դանիելյանի ֆեյսբուքյան գրառման, «Զրկվել են հողատարածքները մշակելու հնարավորությունից՝ մնալով առանց ապրուստի միջոցի։ Թշնամու առաջխաղացումից հետո այլեւս անհնարին է դարձել արոտավայրերի օգտագործումը։ Գյուղի բնակիչները պահանջում են, որ իրենց զենք տրամադրվի՝ հնարավոր դիվերսիոն հարձակումների դեպքում ինքնապաշտպանության հնարավորություն ունենալու համար»։
Ցավալի է, որ այդ գյուղում նման իրավիճակ է ստեղծվել: Բայց դա շուրջ երկու տարի առաջ իրենց ընտրության՝ երբ ձայն էին տալիս պարտվողական իշխանությանը, արդյունքն է: Ցավալի է, բայց դա այն դեպքն է, երբ ոչ գիտակից ընտրությունը շատ արագ վերադառնում է բումերանգի հարվածի տեսքով: Իհարկե, զուտ Տեղի գյուղացիների քվեների արդյունքում չէ, որ վերարտադրվել է Նիկոլի իշխանությունը: Բայց առնվազն Սյունիքում, Վայոց Ձորում եւ Գեղարքունիքի արեւելյան մասում բնակվողներից ոչ մեկը չպետք է ձայն տար Նիկոլի կուսակցությանը: Որովհետեւ դրանով նրանք ոչ թե իրենց համար ապագա ապահովեցին, այլ զրկվեցին ապագայի հույսից:
Ինչ մնում է գյուղացիների պահանջին, ապա ենթադրում եմ, որ այն երբեք չի բավարարվի: Որովհետեւ, նախ, սահմանը, ըստ Նիկոլի, պետք է պահեն սահմանապահները, իսկ Տեղի խաղաղ բնակչները սահմանապահ չեն: Երկրորդ․ եթե տեղացիներին զենք տրամադրվի, ապա նրանք դա, բնականաբար, կօգտագործեն ընդդեմ թշնամու, ինչը հակադրվում է Ադրբեջանի հետ էսկալացիայից խուսափելու նիկոլական տրամադրվածությանը: Դա, իր հերթին, նշանակում է, որ ինքնապաշտպանական մարտեր մղելով թշնամու դեմ՝ Տեղի բնակիչները խոչընդոտելու են նիկոլական խաղաղության օրակարգի կյանքի կոչմանը:
Երրորդ եւ ամենակարեւորը՝ վստահ եմ, որ Նիկոլը երբեք չի համաձայնի սահմանին ապրող մարդկանց զենք տրամադրելուն, քանի որ գիտի, որ մի գեղեցիկ օր այդ զենքը կարող է ուղղվել իր դեմ, երբ նա հերթական անգամ զինված ուժերին հրաման արձակի՝ չկրակել վայրագ ագրեսորի ուղղությամբ: Ի դեպ, դա էլ է նիկոլական տրյուկներից մեկը՝ արգելել թշնամու ուղղությամբ կրակելը, իսկ հետո, երբ կրքերը հանդարտվում են, հռետորական հարց բարձրացնել, թե այդ որ հրամանատարն է դեմ եղել դիրքերը ետ վերցնելուն: Իսկ իրավապահներին էլ հրահանգել քրեական գործ կարել նրանց նկատմամբ:
Այն, որ արդեն համարյա 5 տարի վարչապետ կարգված անձը չի դադարում սուտ խոսելուց, սիմպտոմատիկ երեւույթ է նրա առումով: Միաժամանակ, դժբախություն է՝ ազգային առումով: Կարծում եմ, որ այդ երեւույթը մի ոչ գեղեցիկ օր (իր տեսակետից) առիթ կհանդիսանա այսօր դեռեւս իրեն հավատարիմ բազմության ըմբոստության համար: Դա գիտակցելով, հատկապես որ առկա է իր նախորդի՝ խոսքը դրժելու օրինակը, ինքը երբեք չի համաձայնի, որ սահմանային բնակչության ձեռքին զենք հայտնվի: Որովհետեւ վերը նշված (ըմբոստության) հանգամանքով պայմանավորված՝ այդ զենքը հանգիստ կարող է ուղղվել իր դեմ: Ու այդ պատճառով էլ անձամբ իրեն ձեռք է տալիս կորցնել տարածքներ, սակայն անպաշտպան թողնել իր մեղքով սահմանային դարձած գյուղերի բնակիչներին: Ի դեպ, նիկոլական ստի մասին գրելուց հիշեցի նրա վերջին (հերթական) սուտը․ «Մենք եւս ընդդիմություն ենք եղել, սակայն 5-րդ շարասյուն չենք եղել»: Դա ասվեց քառօրյա պատերազմի առումով՝ մոռանալով, որ պատերազմի առաջին երկու օրը Ֆեյսբուքում եւ լրատվական կայքերում տարածվում էր այն սուտը, որ ՀՀ ԶՈՒ ԳՇ պետ Յու. Խաչատուրովը բիլիարդ է խաղացել գիշերվա կեսին եւ պատերազմի մասին լուրին արձագանքել է մի քանի ժամ ուշացումով: Մոռանալով նաեւ, որ հենց վերջերս իր կողմնակիցներից մեկը դատարանի որոշմամբ ստիպված էր հերքել իր իսկ տարածած ապատեղեկատվությունը:
Հույս ունեմ, որ մի իսկապես գեղեցիկ օր նիկոլական սուտը կվերածվի իր քաղաքական կյանքի գերեզմանափորի: Հենց քաղաքական, քանի որ չեմ կորցնում հույսս, որ ինքը քաղաքական կյանքի ավարտից հետո ունենալու է բավական երկար ժամանակ՝ մի որեւէ վայրում կյանքի իմաստի վերաբերյալ միայնակ խորհրդածելու համար:
1
2
3
4
5
1
2
3
4
5
1
2
