Օլանդը դեմ է ԵՄ-ի գագաթնաժողովում Մեծ Բրիտանիայի պահանջները քննարկելուն

Ֆրանսիայի նախագահ Ֆրանսուա Օլանդը հայտարարել է, որ ԵՄ-ի բարեփոխման վերաբերյալ Մեծ Բրիտանիայի պահանջների հարցը չպետք է քննարկվի Եվրամիության՝ փետրվարի 18-19-ին նշանակված գագաթնաժողովում, տեղեկացնում է «Արմենպրես»-ը՝ հղում անելով Agence France-Presse-ին:

«Մենք ցանկանում ենք, որ Մեծ Բրիտանիան մնա Եվրամիության կազմում: Ձեռք բերված փոխզիջումը հավանաբար թույլ կտա մեզ գտնել այն հիմնախնդիրների լուծումը, որոնք մինչ այժմ դժվար լուծելի էին թվում: Սակայն Եվրամիության գագաթնաժողովում չպետք է նոր ճշգրտումներ կամ նոր բանակցություններ լինեն»,- նշել է Ֆրանսիայի նախագահը:

Օլանդը նաեւ դեմ է արտահայտվել եվրոգոտու երկրների քաղաքականության հարցում Մեծ Բրիտանիային վետոյի իրավունք տրամադրելուն:

«Եվրոյի գոտու մեջ չմտնող երկիրը չի կարող վետոյի իրավունք ունենալ եվրոգոտու մեջ մտնող երկրների թվում»,- Օլանդի հայտարարությունը մեջբերել է Reuters գործակալությունը:

Եվրախորհրդի նախագահ Դոնալդ Տուսկը փետրվարի 2-ին ներկայացրել Է ԵՄ-ի բարեփոխումների նախագիծը, որոնք պետք Է Մեծ Բրիտանիայի վարչապետ Դեւիդ Քեմերոնի կառավարությանը թույլ տան կոչ անել իրենց ընտրողներին՝ հանրաքվեում քվեարկել Միության կազմում երկրի պահպանման օգտին: Փաստաթուղթը ներառում Է «ազգային խորհրդարանների կողմից եվրոպական օրինագծերի վերանայման մեխանիզմը» եւ Մեծ Բրիտանիայի իրավունքը՝ «մինչեւ չորս տարի ժամկետով հետաձգել նոր ժամանած օտարեկրյա միգրանտների ներգրավումը երկրի սոցիալական համակարգում»:

Այն նաեւ երաշխավորում Է Միացյալ Թագավորության իրավունքը՝ «ձեռնպահ մնալ ԵՄ-ին ավելի խորը քաղաքական ինտեգրացումից (ներառյալ եվրոյի գոտուց եւ Շենգենից դուրս մնալու իրավունքը), ինչպես նաեւ օգտվել անվտանգության ոլորտում ինքնուրույն որոշումների ընդունման իրավունքից: Բացի այդ, ԵՄ-ի երկրները «զգալիորեն կակտիվացնեն ջանքերը եվրոպական արտադրանքի մրցունակությունը բարձրացնելու համար», հաղորդել Է ՌԻԱ Նովոստին:-