Տարօրինակ հարձակում Կրեմլի վրա

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Կրեմլի վրա, ենթադրաբար, ուկրաինական կողմի իրականացրած ԱԹՍ-ով հարձակումը, ինչ խոսք, չափազանց զարմանալի էր։ Միացյալ Նահանգներն արդեն հայտարարել է, որ իր հետ չեն համաձայնեցրել այդ գործողությունը։ Մոսկվան հակադարձել է, որ Կիեւը չի կարող որեւէ նման որոշում կայացնել առանց Վաշինգտոնի հետ համաձայնեցնելու։ Փարիզի համար միջադեպը չափազանց տարօրինակ էր ու խորհրդավոր։ Եվ իրականում էլ միջադեպը, մեղմ ասած, անհասկանալի էր, անբացատրելի։ Հատկապես եթե հիշենք, որ շաբաթներ առաջ Կրեմլի բավականին երեւացող մասում տեղակայվել էին ՀՕՊ համակարգեր։ Տպավորություն է, որ սա առիթ է դառնալու ռուս-ուկրաինական պատերազմի նոր սրացման՝ ուկրաինական հնարավոր հակահարձակման նախաշեմին։ Թեեւ, որոշ տեղեկությունների համաձայն, այն փաստացի արդեն սկսվել է։

Տպավորություն է նաեւ, որ Մոսկվայում ուզում էին, որ նման միջադեպ լինի, որպեսզի իրենց հետագա գործողությունները լինեն արդարացված, հիմնավորված։ Ռուսաստանը, իհարկե, այն պետությունը չէ, որ այնքան թույլ լինի, որ իր պետականության «սրբության սրբոցն» անպաշտպան թողնի։ Ռուսաստանում անօդաչու թռչող սարքն օդ բարձրացնել հնարավոր է միայն արտոնություն ունենալուց հետո, հակառակ դեպքում մի քանի տարվա բանտարկությամբ քրեական հոդված կդնեն, եւ նման չսանկցիավորված քայլը կարող է որակվել ընդհուպ մինչեւ շպիոնաժ եւ պետական դավաճանություն։ Հետեւաբար, հատկապես Դուգինի դստեր սպանությունից հետո այնքան է խստացվել հսկողությունը երկրում, որ դժվար թե որեւէ մեկը Մոսկվայում ԱԹՍ բարձրացներ եւ ուղղեր դեպի Կրեմլ, եւ նրան չհայտնաբերեին ու չոչնչացնեին ակնթարթների ընթացքում։ Առավել կարեւորն այստեղ այն է, թե դրան ինչպես է պատասխանելու Ռուսաստանը։ Ամենայն հավանականությամբ, հրթիռային հարվածներ կամ ԱԹՍ-ներով կհարվածի Կիեւին։ Հնարավոր է, որ անգամ հարվածներ հասցվեն Զելենսկու նստավայրին կամ ուկրաինական զորքերի հրամանատարության կենտրոնին եւ այլն։ Հնարավոր է, որ կաթվածահար անեն երկաթուղային ենթակառուցվածքները։ Ուկրաինական ճակատում ռուսական հնարավոր գործողություններից կարելի կլինի գոնե մոտավորապես հասկանալ, թե ինչ «բորշչ եփվեց», եւ ով եփեց այն։

Ի դեպ, շատերը մոռացել են, սակայն Սովետական պերեստրոյկայի տարիներին էլ Կրեմլի հրապարակում չսանկցիավորված փոքր գերմանական ինքնաթիռ իջավ՝ շոկի մեջ գցելով ՍՍՀՄ քաղաքացիներին եւ խարխլելով հավատը ՍՍՀՄ կուռ անվտանգային համակարգի ու կագեբեի նկատմամբ։