Արցախում մարդիկ ակնհայտորեն չեն հասկանում, թե ինչ է կատարվում

Արցախում մարդիկ ակնհայտորեն չեն հասկանում, թե ինչ է կատարվում: «Արցախի անվտանգության և զարգացման ճակատ» հանրային շարժման համակարգող, նախկին պետնախարար Ռուբեն Վարդանյանն է այս արձանագրումն արել՝ վերջին շաբաթներին հանրության հետ իր հանդիպումների արդյունքում։

Նրա խոսքով, մի շարք առանցքային հարցերի շուրջ անհասկանալի դիրքորոշումը, տեղեկատվության փակ լինելը, հակասական հայտարարությունները շփոթության մեջ են գցում մարդկանց։ «Արցախն այժմ ծանր փորձությունների միջով է անցնում: Մարդիկ խոսքի, շփման կարիք ունեն, կարիք ունեն հասկանալու, թե ինչ է կատարվում: Իշխանությունների որոշումներն ու հայտարարությունները պետք է լինեն շատ հստակ ու հասկանալի։ Հատկապես՝ կարմիր գծերի պահպանման և դրանք խախտելու դեպքում արձագանքի առումով։ Բոլորս միասին պետք է ամեն օր պայքարենք կարմիր գծերի անխախտելիության համար, հենց դրա համար են դրանք կարմիր գիծ համարվում»,- նշել է Վարդանյանը:

Նախկին պետնախարարի գնահատմամբ, այսօր գլխավոր հարցն իշխանությունների արձագանքն է ադրբեջանական ապօրինի անցակետին։ «Ի՞նչ սկզբունքով են ընտրվել այն մարդիկ, ովքեր անցել են անցակետով: Ինչու՞ են իշխանություններն ընդունելի համարում, որ ադրբեջանցիները մեր անձնագրերը վերցնեն, ստուգեն ու նկարեն: Ո՞վ է սահմանում կանոնները: Ո՞վ է պատասխանատվություն կրելու, եթե ինչ-որ բան այն չլինի»,- նշել է նա և հավելել, թե այս հարցերի պատասխանները չկան, ճշմարտության և հստակության փոխարեն խոսակցություններ և վարկածներ են: Իսկ սա վստահության ամրապնդման համար լավագույն միջավայրը չէ:

Ըստ նախկին պետնախարարի, «Արցախի անվտանգության և զարգացման ճակատ» հանրային շարժումն իր հերթին հետևողականորեն և համակարգված աշխատանք է տանում արցախցիների հետ: «Մենք ներկայացնում ենք մարդկանց շարժման նպատակն ու սկզբունքները, թե ինչպիսին է իրավիճակն իրականում: Ճշմարտությունը, թափանցիկությունն ու ըմբռնումը վստահության հիմքն են, և դա Արցախի պաշտպանության գործում հաջողության հասնելու հիմնական պայմաններից մեկն է»,- գրել է Վարդանյանը։

Նարինե Բարսեղյան