Նոր ու կեղտոտ արշավ Ռուբեն Վարդանյանի դեմ

Արցախում «Անվտանգության և ռազմական ճակատի» հզորացմանը զուգահեռ ակնկալելի էր, որ ճակատի համակարգող Ռուբեն Վարդանյանը հայտնվելու է ներքին և արտաքին թշնամիների թիրախավորված հարձակումների ներքո, նման զարգացումներ մենք վաղուց էինք կանխատեսել։

Երեկ էլ հերթական իբր սկանդալային տեղեկություններ են հայտնել, Արցախի նախկին պետնախարար Ռուբեն Վարդանյանին մեղադրելով՝ «Ռոսնանոյի» նախկին գլխավոր տնօրեն Անատոլի Չուբայսին ապօրինի օգնելու, հարկային մարմիններից փողերը «թաքցնելու» մեջ։

Ակնհայտորեն ադրբեջանական աղբյուրներից սնվող «Русский Криминал» կայքը հրապարակել է Չուբայսի և ոմն Սուչկովի հեռախոսազրույցը, որտեղ հենց Ռուբեն Վարդանյանի մասին է խոսք գնում, իբր նա օգնելու է, որ 35-36 միլիոն դոլար արժողության առանձնատունը վաճառեն շատ ավելի ցածր գնով Չուբայսի մերձավորներին։

Այն, որ Վարդանյանին պարբերաբար փորձում են մեղադրել տարբեր օվշորային գործարքների և ապօրինությունների մեջ, նոր բան չէ, անձամբ նույնիսկ Ադրբեջանի նախագահ՝ Իլհամ Ալիևն էր նման կեղծիքներ տարածել։ «Троика диалог»-ին վերաբերող տեղեկությունը ժամանակին Ռուբեն Վարդանյանի գրասենյակը հերքել էր մանրամասն և հանգամանալից, սակայն Ադրբեջանն առիթը բաց չի թողնում Արցախի նախկին պետնախարարի հասցեին մեղադրանքներ հասցեագրելու։

Զարմանալիորեն կեղտոտ այս տեղեկությունը հայտնվում է նաև հայկական որոշ լրատվամիջոցների էջերում, որոնք առանց տեղեկությունը ճշտելու կամ գոնե պարզաբանում ստանալու Ռուբեն Վարդանյանի գրասենյակից երկրորդում են Իլհամ Ալիևին և ադրբեջանական կեղտոտ քարոզչամեքենային՝ կեղծ մեղադրանքներ հասցեագրելով Արցախի նախկին պետնախարարի դեմ։

Թերևս Իլհամ Ալիևն այս առումով միայնակ չէ, Հայաստանի գործող իշխանություններն ոչ պակաս աջակցում են Ադրբեջանին, քանի որ Արցախում Ռուբեն Վարդանյանի հայրենանվեր գործունեութունից վտանգ են զգում ոչ միայն Բաքվում, այլ նաև պաշտոնական Երևանում, ուստի զարմանալի չէ, որ այս ապատեղեկատվությունը տարածել են թե՛ ուղղակիորեն Քաղաքացիական պայմանագրի հետ կապ ունեցող լրատվամիջոցները, և թե՛ իրենց ընդդիմադիր հորջորջող, սակայն իրականում այս իշխանությունների հետ սերտ և մտերմիկ կապեր ունեցող ԶԼՄ-ները։

Գոհար Սիրադեղյան