Զпհեր, մի քանի տասնյակ տուժածներ․ պայթյուն՝ Մոսկվայի առևտրի կենտրոնում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Մոսկվայի արևմուտքում գտնվող «Վրեմենա Գոդա» առևտրի կենտրոնում եռման ջրով խողովակ է պայթել:

Ողբերգության հետևանքով, նախնական տվյալներով, չորս մարդ է մահացել, կան տուժածներ, որոնցից մի քանիը ստացել են ծանր այրվածքներ։ Բոլոր 4 զոհերը կանայք են:

Դեպքի վայրում աշխատում են հրշեջ-փրկարարները, ոստիկանությունը և բոլոր արտակարգ ծառայությունները, հերթապահում են շտապ օգնության մեքենաները։

Առևտրի կենտրոնի աշխատակիցները լրատվամիջոցներին հայտնել են, որ աշխատողներն ու ներսում գտնվող քաղաքացիները անմիջապես չեն տարհանվել, 2-րդ և 3-րդ հարկերի շարժասանդուղքները դեռ որոշ ժամանակ աշխատել են։

\

ՌԴ Քննչական կոմիտեն քրեական գործ է հարուցել մարդկանց մահվան պատճառ դարձած ոչ անվտանգ ծառայությունների մատուցման հոդվածով։ Առևտրի կենտրոնում տեղի ունեցած միջադեպի հանգամանքներն ու պատճառները պարզելու համար հսկողություն է իրականացնում դատախազությունը։

Փրկարարական աշխատանքների պատճառով ժամանակավորապես փակվել է Կուտուզովսկի պողոտայից դեպի «Վրեմենա Գոդա» առևտրի կենտրոնի տարածք ելքը։

Սկզբում հաղորդվել է 1 զոհի մասին, այնուհետ Մոսկվայի քաղաքապետ Սերգեյ Սոբյանինը իր «Տելեգրամ»-ի ալիքում հայտնել է, որ խողովակի պայթելու հետևանքով զոհերի թիվը հասել է չորսի.

«Առևտրի կենտրոնում տեղի ունեցած ողբերգությունը խլել է ևս երեք մարդու կյանք։ Ցավակցում ենք ընտանիքիներին և հարազատներին։ Փրկարարները շարունակում են աշխատել»,- գրել է նա։

Մինչ այդ քաղաքապետը հայտնել էր, որ Մոսկվայի «Վրեմենա Գոդա» առևտրի կենտրոնում խոշոր վթար է տեղի ունեցել եռացրած ջրով պայթած խողովակի պատճառով, կան այրվածքներով տուժածներ։

Ավելի ուշ Մոսկվայի դատախազությունը պարզաբանել է, որ արտակարգ իրավիճակի ժամանակ բոլոր մահացածները կանայք են։ Արտակարգ իրավիճակների նախարարությունից հավելել են, որ վթարից հետո ինը մարդ հոսպիտալացվել է։

Լլրատվամիջոցները հայտնել են, որ 18 մարդ որոշ ժամանակ կտրված է ելքից, սակայն նրանք գտնվել են «անվտանգ սենյակում»։  Միջադեպը, ամենայն հավանականությամբ տեղի է ունեցել առաջին հարկում:

«Ես սկսեցի ներքև նայել շարժասանդուղքի ուղղությամբ, և այնտեղ հսկայական տաք գոլորշու ամպեր էին բարձրանում, իջա առաջին հարկ, և մոտ քսան րոպե մենք կանգնեցինք և չկարողացանք տարհանվել: Շարժասանդուղքն աշխատում էր երկրորդ կամ երրորդ հարկում, այն այլևս չէր աշխատում առաջին հարկում, իսկ բազրիքները բոլորը չափազանց տաք էին, բռնել անհնար էր»,-պատմել է առևտրի կենտրոնի աշխատակից երիտասարդը։

«Վրեմենա Գոդա» վեց հարկանի  առևտրի կենտրոնը՝ ավելի քան 62,000 քառակուսի մետր մակերեսով, բացվել է 2007 թվականին։

Կայքից ստացված տեղեկատվության համաձայն՝ մոլում ներկայացված են ավելի քան 500 ապրանքանիշեր՝ միջազգայնորեն ճանաչվածից մինչև ավանգարդ, որոնք առաջարկում են հագուստի, կոշիկի և աքսեսուարների կանացի և տղամարդկանց հավաքածուներ, զարդեր, ժամացույցներ, օծանելիք և կոսմետիկա, կենցաղային ապրանքներ։Առևտրի կենտրոնն ունի ավելի քան 150 բուտիկ և խանութ, այդ թվում՝ 24-ժամյա մթերային խանութ, «Chanel», «Hermes», «Dior», «Louis Vuitton», «Gucci», «Burberry», «Bvlgari», «Cartier», «Stella McCartney», «Salvatore Ferragamo» ապրանքանիշերը։