Նիկոլ Փաշինյանն առաջարկեց նվազեցնել վերարտադրողական ծրագրերում ներառված կանանց տարիքը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Կառավարությունը այսօրվա նիստում հաստատեց «ՀՀ 2023 թվականի պետական բյուջեի մասին» օրենքում վերաբաշխում, փոփոխություններ և լրացումներ, ինչպես նաև Կառավարության 2022 թվականի դեկտեմբերի 29-ի N 2111-Ն որոշման մեջ փոփոխություններ և լրացումներ կատարելու և Առողջապահության նախարարությանը գումար հատկացնելու մասին որոշումը:

Նախագծով առաջարկվում է 500 միլիոն դրամ լրացուցիչ միջոցներ հատկացնել Առողջապահության նախարարությանը վերարտադրողական առողջության ծրագրի համար:

Առողջապահության նախարար Անահիտ Ավանեսյանի խոսքով՝ Կառավարությունը, կարևորելով Հայաստանում անպտղության հաղթահարումը, դեռ 2019 թվականին մեկնարկել է պետպատվերի շրջանակներում վերարտադրողական օժանդակ տեխնոլոգիաների կիրառմամբ թանկարժեք ծառայությունների հասանելիությունը բնակչության համար:

«Հաշվի առնելով բնակչության մեծ պահանջարկը, այն պարբերաբար վերանայվել է և կատարված փոփոխությունների արդյունքում նախկին 38 բնակավայրերի փոխարեն 194 սահմանամերձ բնակավայրերի բնակիչներ հնարավորություն կունենան միանալ այս ծրագրին:

Հաջորդ վերանայումը կապված էր 44-օրյա պատերազմի հետևանքների հետ, որի արդյունքում ծրագրի շահառու դարձան պատերազմում զոհված զինծառայողների ծնողները, նրանց համար գործարկվեց նաև փոխնակ մայրության ծրագիրը, ինչի շնորհիվ շատ ընտանիքներում կրկին վառվեց լույսի ճրագը»,- ասաց Ավանեսյանը:

Նախարարը նշեց՝ ծրագիրն ունի չափազանց մեծ պահանջարկ: Ծրագրի գործարկման ընթացքում արդյունավետությունը՝ այսինքն ծնված բալիկների թիվը կազմել է 31.4 տոկոս, ինչը բավարարում է զարգացած երկրներում միջին ցուցանիշներին:

«Ծրագրի շրջանակներում զոհված զինծառայողների մայրերի համար տարիքային ոչ մի սահմանափակում չի գործում: Սույն թվականի հունվարին ծրագրի շահառու դարձան մինչև 36 տարեկան երկու տարի և ավել անպտղություն ունեցող բոլոր անզավակ կանայք, սահմանամերձ բնակավայրերում ապրող 36-42 տարեկան կանայք, ովքեր ունեն երկրորդ բալիկ ունենալու դժվարություններ: Եվ այսպես միայն 2023 թվականի ընթացքում սպասարկվել և  բուժման տարբեր փուլերում են գտնվում 2876 շահառու, արձանագրվել է 2301 հղիություն, ծնվել է  57 բալիկ 9 զոհված զինծառայողների ընտանիքներում:

Աշխատանքներ ենք տանում նաև ծրագրի հասանելիությունը մեծացնելու մասով: Առաջիկայում մարզային քաղաքաներում կբացվեն առաջին փուլը գործարկող կենտրոններ, կսկսենք Գյումրիից, այնուհետ Վանաձորում և Գորիսում ևս կունենանք այս ծրագրի իրագործման հնարավորություն»,- ասաց Ավանեսյանը:

Մեկնաբանելով նրա խոսքերը, վարչապետ Նիկոլ Փաշինյանը հարցրեց՝ ինչո՞ւ 32, ինչո՞ւ ոչ 22 կամ 18:

«Մարդը 18 տարեկան չափահաս մարդ է՝ իրավունք ունի որոշում կայացնելու, էդ ո՞նց ենք որոշել 32: Դա է նպատակը ծրագրի, որ մարդն ուզում է,  որոշում է  կայացրել: Չենք կարող մարդկանց ստիպել, թե գնացեք ամուսնացեք, ուզում են՝ ամուսնանում են, չեն ուզում՝ ոչ, ուզում են երեխա ունենալ՝ ունենում են, չեն ուզում՝ չեն ունենում: Մեր ծրագրի նպատակը դա է, ինչո՞ւ ենք տարիքային շեմ սահմանել, մարդն ինքն է որոշում օգտվի, թե՝ չէ, պետք է այդ տարիքային շեմը վերացնել: Ով որևէ պատճառով նման մտադրություն ունի, պետք է այդ ծրագիրը հասանելի դարձնել նրանց համար»,- նշեց Նիկոլ Փաշինյանը: