Թուրքիայի մտավորականները դիմել են համաշխարհային հանրությանը՝ միջամտելու բացել Լաչինի միջանցքը և կանխել աղետը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին


Թուրքիայի քաղաքական գործիչները, գրողները և մարդու իրավունքների պաշտպանները համախմբվել են՝ դիմելու համաշխարհային հանրությանը՝ կոչ անելով անհապաղ միջամտել Լեռնային Ղարաբաղում Ադրբեջանի շրջափակման հետևանքով առաջացած հումանիտար ճգնաժամը մեղմելու համար, գրում է GercekNews-ը։

Քանի որ Ադրբեջանի կողմից Լաչինի միջանցքի շրջափակումը թևակոխում է ութերորդ ամիս, և երբեմնի կենսունակ Լեռնային Ղարաբաղը գտնվում է սարսափելի հումանիտար ճգնաժամի եզրին, մի խումբ թուրք մտավորականներ, գրողներ, քաղաքական գործիչներ և մարդու իրավունքների պաշտպաններ միավորվել են՝ ազդեցիկ կոչով դիմելու համաշխարհային հանրությանը՝ անհապաղ միջամտելու այդ խնդրին, տառապանքը մեղմելու և հնարավոր աղետը կանխելու համար:

«Անողոք շրջափակումը, որը հաստատվել է Բաքվի կառավարության կողմից և ուժեղացված Անկարայի աջակցությամբ, ոչ միայն մեկուսացրել է Լեռնային Ղարաբաղի հայ բնակչությանը, այլև մտավախություն է ներշնչել մոտալուտ ցեղասպանության վերաբերյալ: Այս ծանր իրավիճակը դրդել է մի խումբ ազդեցիկ թուրք գործիչների բարձրացնել իրենց ձայնը` խրախուսելով միջազգային գործողությունների` դադարեցնելու շրջափակումը և փրկօղակ առաջարկելու շրջափակման մեջ գտնվող բնակիչներին»,-գրում է պարբերականը:

«Ակնհայտ է, որ առաջին անհրաժեշտության պարագաները չեն կարողանում հասնել Լեռնային Ղարաբաղ, և բնակիչները հայտնվել են թակարդում` առանց շտապ բժշկական օգնության: Ճգնաժամի խորացմանը զուգընթաց և ի հաստատումն միջազգային մտահոգությունների՝ Բաքվի բռնապետ Իլհամ Ալիևը շարունակում է բացահայտ և շարունակաբար սպառնալ Ղարաբաղի ժողովրդին այն աստիճան, որ Միջազգային քրեական դատարանի նախկին գլխավոր դատախազ Լուիս Մորենո Օկամպոն կարևոր հոդված է հրապարակել, որտեղ Ալիևի գործողությունները Ղարաբաղում որպես ցեղասպանություն է որակում»,- ասվում է խմբի հայտարարության մեջ, որով կոչ է արվում բոլոր պետություններին, միջազգային կազմակերպություններին, մասնավորապես Միացյալ Նահանգներին, Միջազգային Կարմիր Խաչին և միջազգային հանրությանը ակտիվ դիրքորոշում ցուցաբերել:

«Պատմական զուգահեռներ տանելով Երկրորդ համաշխարհային պատերազմի հետ, թե ինչպես 1948-49 թվականներին օդային փոխադրումների միջոցով ճեղքվեց Բեռլինի շրջափակումը, մենք կոչ ենք անում ճեղքել Ղարաբաղի շրջափակումը օդային մատակարարման ուղիներով՝ դրանով իսկ վերջ դնելով այս ողբերգությանը»,- ասված է հայտարարության մեջ։