Փոթորիկ մեկ բաժակ ջրում

Արցախում իրավիճակը թեժացնելու և «Արցախի անվտանգության ու զարգացման ճակատին» քաղաքական գործընթացներից դուրս մղելու հարցում շահագրգիռ երեք կողմ կա՝ Ադրբեջանը, Հայաստանի վարչապետի պաշտոնը զբաղեցնող Նիկոլ Փաշինյանն ու նրա արցախյան սպասարկուները՝ նախագահ Արայիկ Հարությունյանի գլխավորությամբ։ Ընդ որում, Արցախի նախագահն ինքն էլ գիտակցում է իր արարքի բոլոր հետևանքները, երբմեն-երբեմն փորձում է փախչել իրականությունից ու պատասխանատվությունից, սակայն նրան պարզապես պարտադրում են մնալ և կատարել Փաշինյան-Ալիև զույգի պահանջները։

Օրեր առաջ, երբ նախկին պետնախարար Ռուբեն Վարդանյանը հանդես եկավ տեսաուղերձով և Արայիկ Հարությունյանին մեղադրեց հրաժարական տալու իր խոստումը դրժելու մեջ, ակնհայտ էր, որ Հարությունյանն ինքնագլուխ չէ, որ հրաժարվել է հրաժարական տալ։ Հարությունյանը 44-օրյա պատերազմից հետո քանիցս է ցանկություն ունեցել լքել Արցախը, պատասխանատվությունը թողնել այլոց վրա, հեռանալ՝ վայելելու տարիների ընթացքում կուտակած հարստությունը։ Այդ նպատակով Արցախի նախագահը, թե՛ Սահմանադրական փոփոխություններ էր նախաձեռնել, թե՛ Ռուբեն Վարդանյանին՝ պետնախարար նշանակել։ ՀՅԴ անդամ, Ռուբեն Վարդանյանի հետ հուշագիր ստորագրած Դավիթ Իշխանյանին Ազգային ժողովի նախագահի պաշտոնում ընտրելն էլ հենց այդ տրամաբանության մեջ էր։

Ի վերջո, Հարությունյանին պարզապես արգելեցին հրաժարական տալ, քանի որ նոր ղեկավարությունը, որը, ըստ ամենայնի, «Արցախի անվտանգության և զարգացման ճակատից» պիտի լիներ, խնդիրներ էր հարուցելու, և՛ Նիկոլ Փաշինյանի, և՛ Ադրբեջանի համար։

Այս օրերին իրավիճակը փոքր-ինչ հանդարտվել է, սակայն դեռ խոսակցություններ կան, որ Հարությունյանը դիմել է Արցախի պաշտպանության նախկին նախարար, Արցախում տխուր համբավ ունեցող Սամվել Բաբայանին, որ վերջինս օգնի իրեն ազատվել Ռուբեն Վարդանյանից և նրա կողմնակիցներից։ Եթե մինչ վերջերս Սամվել Բաբայանն առանձնապես հակված չէր օգնել Հարությունյանին, ապա այժմ պաշտոնի խոստման դիմաց համաձայնել է։

Մեր աղբյուրների փոխանցմամբ, Սամվել Բաբայանը պահանջել է իրեն պետնախարար, իսկ իր խմբակցության պատգամավորներից մեկին՝ Արցախի ԱԺ նախագահ նշանակել՝ գործող նախագահին խոստանալով, որ դրանից հետո նա հնարավորություն կունենա հանգիստ հեռանալ Արցախից, իսկ իրավիճակի պատասխանատուն ինքը կլինի։ Այս հարցում առանցքային է Արայիկ Հարությունյանի «Ազատ հայրենիք-ՔՄԴ» խմբակցության դիրքորոշումը, որն ամենաշատ թվով պատգամավորներն ունի։ Մինչ Արցախի գործող նախագահը նոր դավադրություն է մտմտում, Ռուբեն Վարդանյանն ու Արցախի հայրենասեր ուժերը փորձում են կասեցնել այս վտանգավոր ընթացքը։ 

Արամ Ծատուրյան