Ռուբեն Վարդանյանը պատասխանել է իշխանության մաինպուլյացիաներին

Արցախի անվտանգության և զարգացման ճակատի համակարգող, նախկին պետնախարար Ռուբեն Վարդանյանին մեծ ցավ է պատճառում պահելաձևը քաղաքական դաշտում և ընդհանրապես հասարակության մեջ այն մակարդակը, ընդհանուր բարոյական շեմի իջեցումը, ըստ Վարդանյանի՝ անընդունելի է։ Նախօրեին կայացած ասուլիսում Ռուբեն Վարդանյանը հիշեցրել է Անդրանիկ Քոչարյանի, ԱԺ նախագահ Ալեն Սիմոնյանի հայտարարությունները։ «Նրանք չեն հասկանում, որ դա առաջին հերթին իրենց մակարդակն է, իրենց մտածելակերպը, թե իրենք ոնց են նայում աշխարհին, վնաս են պատճառում Հայաստանին ու Արցախի դիրքերին»,- նշել է Ռուբեն Վարդանյանը՝ հավելելով, թե այսպիսի պահվածքով գործող իշխանությունների ներկայացուցիչները ցույց են տալիս իրենց թուլությունը, որ իրենք այնքան թույլ են, որ պարտվելու են։ «Դուք պարտվելու եք, որովհետև դուք թույլ եք, անգրագետ եք և չեք կարողանում ներկայացնել մեր երկիրը ոչ միջազգային դաշտում, ոչ ներսում»,- հայտարարել է Ռուբեն Վարդանյանը։

Դիմելով Ալեն Սիմոնյանին՝ նախկին պետնախարարը նշել է. «Ձեր պահելաձևը, մարդկանց վրա թքելը և նման բաները բերելու է ձեր պարտությանը, ոչ թե որովհետև ինչ որ դրսի ուժեր ազդում են դրա վրա»։ Ի դեպ, Արցախի նախկին պետնախարարն անդրադարձել է նաև բամբասանքներին, Թաթարստանի հետ կապված թեմային, նշել, որ դա մատից ծծած թեմա է, հիշեցրել, որ այդ հաղորդման մեջ ներկայացրել է իր տեսլականը, որ Հայաստանը կարող է լինել բուֆերային գոտի, կապող ուժ Պարսկաստանի ու Ռուսաստանի, արևմուտք և արևելքի միջև, կարող է դառնալ հետաքրքիր կենտրոն, իսկ գործող իշխանությունների ներկայացուցիչները կտրում են իր խոսքերը կոնտեքստից և փորձում քայլեր ձեռնարկել Հայաստանի պետականության դեմ։ Ըստ Վարդանյանի՝ ինքը նման մանիպուլյացիաներին հանգիստ է վերաբերվում, որովհետև դա ցույց է տալիս հենց գործող իշխանությունների թուլությունը։ 

Լիլիթ Ալավերդյան